Nisur edhe nga rekomandimet e BE-së, Autoriteti i Konkurrencës ka rikthyer fokusin tek mirëqenia e konsumatorit dhe garantimi i saj nga aktorët e tregut.
Duke e quajtur një situatë komplekse operimin në një ekonomi tregu të lirë, kreu i Autoritetit të Konkurrencës, Denar Biba thotë se më problematike mbeten komunikimet celulare dhe karburantet.
“Ka shqetësime të vazhdueshme, sektorët janë nën monitorim. Gjithashtu Autoriteti është duke menduar për nisjen e një hetimi”, tha Biba.
Ky institucion deri më tani numëron 12.4 milionë Euro gjoba të vendosura ndaj në sërë operatorësh në treg, të cilat sipas Bibës nuk kanë arritur ende të mblidhen për shkak të apelimeve.
“Gjobat e fundit kanë qenë në tregun e importit dhe prodhimit të grurit dhe të miellit. Një pjesë e mirë e këtyre firmave kanë marrë edhe sigurimin e padisë nga gjykata, pra kanë bërë të pamundur që ne ta vjelim gjobën”, tha ai.
Ndërsa për Guvernatorin e Bankës së Shqipërisë Gent Sejko shembulli i sektorit bankar është parakusht për rritjen e ekonomisë.
“Konkurrenca dhe disiplina e tregut mjaftojnë për arritjen e rezultateve të dëshiruara. Rregullimi është një komponent i domosdoshëm për mirfunksionimin e sektorit bankar”, tha Sejko.
Aktiviteti i organizuar nga Autoriteti i Konkurrencës në bashkëpunim me GIZ dhe UNDP Albania shënjon edhe 20 vjetorin e themelimit të Autoritetit të Konkurrencës./ Tv Klan
