Luftimet që po zhvillohen midis Armenisë dhe Azerbajxhanit duket se kanë “acaruar” Iranin i cili ka paralajmëruar se luftimet mund të përshkallëzohen në një luftë më të gjerë rajonale. Presidenti Iranian është shprehur se ai shpresonte të “rivendoste stabilitetin” në rajon pas disa ditësh përplasjesh të rënda mbi territorin e diskutueshëm të Nagorno-Karabakut.
“Ne duhet të jemi të vëmendshëm që lufta midis Armenisë dhe Azerbajxhanit të mos bëhet një luftë rajonale,” tha Presidenti Rouhani të mërkurën.
“Paqja është baza e punës sonë dhe ne shpresojmë të rikthejmë stabilitetin në rajon në një mënyrë paqësore“, shtoi ai.
Ndër të tjera ai shtoi se ishte e papranueshme që çdo predhë dhe raketë e humbur të binte në tokën iraniane.
Komentet e tij pasuan raportet se predhat kishin rënë në fshatrat në Iran, pikërisht përtej kufirit të tij verior me Armeninë dhe Azerbajxhanin. “Prioriteti ynë është siguria e qyteteve dhe fshatrave tona,” tha Presidenti Rouhani./ Opinion.al
