Benjamin Metko ka mbi 20 vite që “lufton” me shtetin dhe me individin për të marrë pronën e tij. Ai u bë i njohur në media rastësisht. Nisi ti shpjegonte hallin Kryeministrit gjatë një takimi me fermerë në Maliq, ditën e martë, por fjala u ndërpre…Stafi i kryeministrit vendosi të heqë sinjalin kur të gjitha TV po transmetonin live takimin e Ramës në Maliq. Benjamin Metko ka kontaktuar redaksinë e “Opinion” duke shpjeguar kalvarin e gjatë të vuajtjeve dhe mbivendosjen e pronave që po i çojnë deri në vrasje pas kërcënimeve të vazhdueshme nga palët në konflikt.
Ai thotë se jo vetëm është në sherr me personin që e quan “zaptues të tokës së tij” por edhe me shtetin. “Zyra e hipotekës, komuna, gjykata, policia, të gjithë kanë vënë vulën e tyre që unë të jem sot gjysëm i gjallë e gjysëm i vdekur”, shprehet ai tejet i revoltuar. Çështja është në Gjykatën e Lartë, gjithashtu ka ankimuar edhe pranë Njësisë Antikorrupsion në Kryeministri dhe nuk ka marrë përgjigje. Shpresa e tij ishte Kryeministri… Të paktën kështu deklaron: “Kur erdhi Rama në Maliq mendova se do të më jepte një drejtim. Jo vetëm që fjala ime u ndërpre në televizion, por Kryeministri vetëm kruante kokën. Nuk mora asnjë përgjigje prej tij”, thotë Benjamin Metko për Opinion.al.
Ai ka vënë në dispozicion të gjithë dokumentet mbi pronësinë e tokës që ndodhet në fshatin Libonik në rrugën kryesore Korçë-Libonik. Gjithashtu dëshmon përmes videos se si përmbarimi ka shkuar ta nxjerr prej shtëpisë ku jeton prej 80 vitesh familja e tij. Në një moment me tone të larta, dëgjohet përmbaruesja Eliona Mydini që thotë nuk e njoh Niko Peleshin. (shih videon)
Kalvari e ka zanafillën në vitin 1994, kur i vëllai në bashkëpunim me komunën i ndryshuan emrin nga Benjamin në Arben Metko, dhe i hoqën edhe disa dylym tokë. Ai thotë se nuk flet më me të vëllanë që prej asaj kohe. Më tej rrëfen se gjatë kohës kur ka qenë në emigracion, në vitet 2000 në tokën e tij, anash rrugës kryesore është ngritur një karburant . Ai akuzon për këtë zyrën e hipotekës që i ka tjetërsuar pronën dhe ish-komunën. Në vitin 2012 kanë nisur proceset gjyqësore që vazhdojnë edhe sot e kësaj dite. Benjamin Metko thotë se është arrestuar disa herë dhe i është bërë presion nga policia. Gjithashtu akuzon edhe gjyqtaren për korrupsion dhe vendim të padrejtë. Aktualisht Benjamin Metko, rrezikon të dalë në qiell të hapur jo vetëm pa tokë bujqësore por edhe pa shtëpi, ku ka jetuar prej vitesh ai dhe paraardhësit e tij. Ai përsërit disaherë se zyra e Hipotekës në Korçë i ka dhënë “me përshkrim” pronën e tij një personi tjetër. Aktualisht përmbarimi kërkon ta nxjerrë jashtë dhe t’ia kalojë pronën shtetasit Sherif Abazi.
Më poshtë është video kur përmbarimi shkon ta nxjerrë nga shtëpia në shtator të këtij viti, si dhe dokumentet qe Benjamin Metko ka dërguar në Opinion dhe që sipas tij vertetojnë se është pronar i tokës që është kthyer në mollë sherri dhe jo vetëm kaq, ka rrezik për humbje jetësh…
/Opinion.al
