TIRANE- Propozimi i LSIsë për koncesionet, i prezantuar dje në Komisionin e Veprimtarive Prodhuese nga Petrit Vasili, ku kërkohet që çdo koncesion apo partneritet publikprivat që zgjat më shumë se katër vite të miratohet në Parlament, nuk ka gjetur dakordësinë e kryetarit të Komisionit, Eduart Shalsi, dhe deputetit Namik Kopliku. Ata e kanë konsideruar si të pabazë kërkesën, madje duke dhënë dhe shembuj konkretë se miratimi në Kuvend i këtyre kontratave nuk ka sjellë dobi për qytetarët. Deputeti Namik Kopliku tha se nisma bazohet mbi debatin politik, ndërsa kërkoi ndryshimin e afateve të propozuara.
“Ju ngrini afatin 4 vjeçar për koncesionet dhe kam përshtypjen se këtu jemi pjesë e një debati politik, pasi nëse duhej që një PPP që i intereson publikut, të mos jemi të zotë ta bëjmë ne si shtet, t’ia delegojmë privatit dhe meqë jemi një qeveri e cila pas zgjedhjeve mund të ndërrojë mandatet dhe i lihet trashëgimi një qeverie tjetër, atëherë pse mos ta mbajmë dy vjet?”, u shpreh Kopliku.
Por kreu i Grupit Parlamentar kujtoi se kjo ka qenë kërkesë edhe e opozitës së djeshme, pasi afatet kalojnë mandatet politike. “Ne u referohemi çështjeve që kanë të bëjnë me mandatet dhe jo me kohën kur zbatohet një marrëveshje ose jo. Dhe është fakt që kemi debatuar për koncesionet dhe është kërkuar nga opozita e djeshme që ato të vijnë në Parlament, ka qenë një kredo dhe ky është momenti për t’i bërë. Për çështjen 4vjeçare, ne nuk mund të shmangemi nga një koncept i tillë, sepse duam të lidhim, jo për shkak të presionit politik, por për shkak të një qasjeje shteruese, sepse kryeçështja e debatit politik për koncesionet bëhet vetëm në Shqipëri”, u shpreh Vasili.
Më tej, kryetari i Komisionit Shalsi solli në vëmendje dy kontrata koncesionesh të miratuara nga Parlamenti, që nuk kanë shkuar mirë. “Ju kërkoni që kontratat mbi 4vjeçare të kalojnë në Parlament, ndërkohë ne kemi dy raste konkrete të koncesionit të skanimit të kontejnerëve dhe atë të pullave fiskale, të dy këto koncesione kanë kaluar nëpërmjet Parlamentit. A mjafton përfshirja e Parlamentit në çdo koncesion për ta bërë atë më të mirë?”, tha Shalsi. Por Vasili u përgjigj se shtimi i instrumenteve të kontrollit vinte në përgjigje të kërkesave të Fondit Monetar Ndërkombëtar dhe Bankës Botërore. Ndër të tjera projektligji përfshin që, për vlerësim të kontratave të koncesioneve të përfshihen Ministria e Financave dhe Avokatura e Shtetit. Vasili tha se vlerësimi i studimit nga Financat minimizon risqet e kontratave të koncesioneve. /Gazeta Panorama
