Sekretari Organizativ në PS Blendi Klosi ka shpjeguar në studion e “Opinion” thelbin e fushatës së Partisë Socialiste për të cilën tha se nuk ka në fokus organizimin e mitingjeve të mëdha, por mbjelljen e pemëve.
“Kemi bërë një strategji që të mos e karikojmë situatën, të mos organizojmë mitingje të mëdha. Më shumë se gjysmën e buxhetit ne do ta konsumojmë të mbjellim pemë. A ju pëlqen apo jo jo nuk ka rëndësi.
Është një veprim i yni. Ta bëni ju do të bënit shumë mirë. Punët flasin vetë. Fushata jonë do të jetë kontakti me qytetarët”, tha Klosi, ndërsa përballë kishte deputetin e PD Ervin Salianji.
Më tej ai ironizoi fushatën e PD, ndërsa tha se nuk është në gjendje të mbajë në stadium mbështetësit e saj kur flet lideri historik.
“Për sa i përket anës tjetër të ekranit, ka disa njerëz nuk them se jo. Njerëz të paorganizuar, pa asnjë qëllim. Kur flet lideri historik, stadiumi është bosh. Kjo tregon sa forcë ka politika juaj për të mbajtur mbështetësit tuaj më të flaktë. Nuk i mbani dot as kur flet Sali Berisha. Kjo është drama më e madhe e fushatës suaj”, tha Klosi./Opinion.al
