Dolce & Gabbana ka shkaktuar mjaft polemika me fushatën e saj më të fundit në rrjetet sociale. Seritë e videove “Të hash me shkopinj” janë akuzuar për racizëm. Brand-i i njohur italian u tërhoq edhe nga shfaqja që do të jepte në Shanghai në datën 21 nëntor pasi publikoi video me hashtag #DGlovesChina dhe #DGTheGreatShow. Megjithatë, fushata është konsideruar raciste sepse mbështetet në stereotipe kineze.
Dolce & Gabbana i shpërndau videot në rrjetin social kinez Weibo për të promovuar shfaqjen e 21 nëntorit. Tashmë videot janë hequr nga aty por qarkullojnë ende në Instagram. Në video shihet një modele kineze e cila po përpiqet të hajë ushqim italian si pica, pasta dhe kanoli me shkopinj, dhe ka vështirësi. Në videon me kanoli rrëfyesi madje e pyet modelen edhe “A është shumë i madh për ty?”
https://www.youtube.com/watch?v=KvSVYphuDYo
Kritikët e kanë konsideruar raciste edhe për shkak të elementëve të tjerë të përdorur në video që janë qartësisht “të vjetra dhe stereotipe”. Pamja cliche e modeles, titrat dhe fakti që i quajnë shkopinjtë “shkopa të vegjël” i ka bërë kinezët të mendojnë që Dolce & Gabbana po tallet me vendin e tyre. Kina ka reaguar me protesta dhe hashtagu “Bojkotoni Dolcen” u bë popullor në rrjetet sociale. Disa madje kanë kërkuar edhe që brand-i të kërkojë falje.
Dolce & Gabbana ka reaguar dhe ka thënë se rrjetet e tyre sociale kanë qenë të hakuara. Ata janë shprehur se nuk gëzojnë veçse respekt për Kinën dhe popullin kinez. Megjithatë, falja nuk ka mjaftuar për tregtarët kinezë që ende ndihen të ofenduar dhe janë tërhequr nga marka. Nga e premtja, veshjet dhe aksesorët D&G nuk ishin më të disponueshme në faqet online të blerjeve.
Akuza të mëparshme
Kjo nuk është hera e parë që Dolce & Gabbana akuzohet për racizëm dhe diskriminim. Stefano Gabbana ka bërë edhe disa deklarata kundër homoseksualëve që adoptojnë fëmijë. Ai gjithashtu është tallur me njerëz të famshëm dhe veshjet e tyre, si Lady Gaga, Miley Cyrus, Selena Gomez dhe upërball me kritika pasi veshi zonjën e parë Melania Trump./Opinion.al
