Kryeministri Edi Rama i është përgjigjur akuzave të kreut të opozitës, sipas të cilit vendimi i Këshilit të Europës për të mos dërguar vëzhgues në 30 qershor është një vendim politik, duke mos njohur zgjedhjet.
Sipas Ramës këto janë mashtrime dhe zgjedhjet lokale janë të ligjshme.
“Sajo Artist sajo, çdo ditë një sajesë, s’zhgënjen asnjë ditë o Njish. Po si mund t’u thuash shqiptarëve Këshilli i Europës mori vendim politik për t’u tërhequr nga zgjedhjet se janë të paligjshme?Tani mezi pres çfarë do thuash kur të dalë rrena në shesh. Apo rrena tjetër gati?”, shkruan Rama në Twitter.
Basha tha në deklaratën për mediat se kjo nuk ndodhte nga koha e Komunizmit, ndërsa theksoi se ky vendim ka ardhur pasi 30 qershori nuk është ditë zgjedhjesh në Shqipëri.
Themeluar në vitin 1949, Këshilli ka 47 vende anëtare dhe vepron me një buxhet vjetor rreth 500 milionë euro. Organizata dallon nga Këshilli Europian, i cili përbëhet nga krerët e 28 shteteve pjesëtare të Bashkimit Europian dhe që merret me drejtimin e përgjithshëm politik të Bashkimit Europian./Opinion.al
