Deputetja, Rudina Hajdari ka folur përsëri në lidhje me kërcënimet të ardhura ndaj saj. Hajdari shprehet se është në të mirë të të gjithë deputetëve që të ketë masa më të sigurta në Kuvend.
Po ashtu, deputetja është shprehur se pas masave të sigurisë ajo ndihet më e qetë, ndërsa thekson se; “Nuk kam dëshirë që ta ndaj me publikun si kanë ardhur këto kërcënime, mendoj se është një gjë personale unë kam ndjekur të gjitha hapat e duhura për ta zgjidhur këtë problem”.
Kishit kohë që e mbanit këtë lajm?
Besoj se tensionet ndonjëherë edhe ngrihen, situata është pak e pazakontë dhe kuptohet që ne duhet të jemi sa më të sigurt edhe mos të kemi përballje fizike me të tjerë edhe mendoj se ishte një gjë që duhej bërë edhe për të ardhmen. Ne nuk e parashikojmë dot se çfarë duhet të ndodhë por nga ana tjetër duhet të bëjmë çfarë është e mundur për të siguruar zyrat e Kuvendit, për të mirën e të gjithëve jo vetëm për të mirën time.
Ju keni dhënë një mesazh edhe për të tjerët, pse mendoni se situata do të shkonte në një përballje fizike?
Ne shqiptarët njihemi pak për gjaknxehtësi, po uroj që kjo mos të ndodhte, sidomos kur jemi në një moment që nuk duhet t’i kemi këto lloj përballjesh me njëri-tjetrin, por gjithsesi është një situatë që kaloi dhe uroj që të mos kemi të tilla kërcënimesh në të ardhmen.
Ju keni një mbrojtje, dua ta theksoj ju nuk dëshironi ta ndani shumë me median, por për të folur vetëm paksa në sipërfaqe, ishin këto kërcënime të vazhdueshme që ju e patë të arsyeshme që patjetër duhet të bënit diçka?
Mendoj se ishte një masë sigurie për të mirën e të gjithëve, mendoj se është një shqetësim që mund të mirëkuptohet edhe nga publiku nuk mendoj se ka asgjë më tepër se kaq.
Ishte e domosdoshme mbrojtja për ju?
Për të gjithë zyrat e Kuvendit, mbrojtja është e domosdoshme, sidomos në këto situata.
Si ndiheni tani që jeni e survejuar gjatë gjithë kohës?
Nuk jam e survejuar gjatë gjithë kohës. Nuk duhet t’ju vijë çudi keni deputetë apo kryetarë partish që survejohen gjatë gjithë kohës me 3-4 truproja dhe kjo është një koncept i gjithë pranuar në Shqipëri. Kjo është thjesht për ambientet e Kuvendit, jo për mua si Rudinë, po është për stafin e Kuvendit dhe deputetët që janë brenda atij Kuvendi, të kenë një masë sigurie më të fortë, dhe kjo është fare normale mendoj.
E kuptoj, po për ju çështja bëhet më sensitive, jeni femër dhe situata bëhet më e ndjeshme, ndaj më lejoni dy pyetje të vogla, këto kërcënime kanë qenë verbale apo të artikuluara? Keni marrë mesazhe kërcënuese apo të artikuluara dhe nëse ka një emër konkret?
Nuk kam dëshirë që ta ndaj me publikun si kanë ardhur këto kërcënime, mendoj se është një gjë personale unë kam ndjekur të gjitha hapat e duhura për ta zgjidhur këtë problem.
Mendoni se është zgjidhur tashmë?
Besoj se po./ Opinion.al
