Këngëtarja e famshme ruse, Alla Pugacheva ka kritikuar luftën e Vladimir Putinit në Ukrainë dhe ka kërkuar që të vendoset në listën e agjentëve të huaj të vendit të saj në shenjë solidariteti me bashkëshortin e saj.
Ky reagim i saj erdhi pasi bashkëshorti i Alla Pugacheva, këngëtari dhe prezantuesi televiziv Maxim Galkin, u shtua në regjistrin e agjentëve të huaj të premten nga ministria ruse e drejtësisë, pasi kritikoi dërgimin e trupave rusë në Ukrainë. Ai akuzohet për kryerjen e aktiviteteve politike në emër të Ukrainës dhe për marrjen e fondeve ukrainase.
Përmes një postimi në Instagram Pugacheva tha: Unë kërkoj nga ju që të më përfshini në radhët e agjentëve të huaj të vendit tim të dashur, sepse dua të solidarizohem me burrin tim.
Ajo e cilësoi Galkin si një “patriot të vërtetë dhe të pakorruptueshëm” që dëshiron “prosperitet për atdheun e tij, paqe dhe liri të fjalës”. Po ashtu, këngëtarja kritikoi dhe luftën në Ukrainë, duke thënë se luftë po e bën jetën e qytarëve rusë shumë të vështirë.
Sipas ligjit rus, individët dhe organizatat që mendohet se janë të përfshirë në veprimtari politike që marrin fonde nga jashtë, shpallen agjentë të huaj. Etiketimi si agjent i huaj ka konotacione negative të epokës sovjetike dhe nënkupton një kontroll të fortë të qeverisë. Ata gjithashtu përballen me kërkesa të rënda financiare dhe burokratike./Opinion.al
