Deputeti i PD, Belind Këlliçi ka reaguar pas largimit të kryebashkiakes, së komanduar, të Durrësit nga Komisioni Hetimor i Inceneratorëve.
Këlliçi hodhi akuza të rënda në drejtim të Emiriana Sakos, ku u shpreh së më 14 shkurt i ka dhënë 200 mijë euro Klodian Zotos, i cili është i shpallur në kërkim.
“Kanë shkelur gjithë ligjet për këtë aferë. Kjo, që duhet të jepte përgjigje sot, më 14 shkurt i ka dhënë 200 mijë euro një personi në kërkim, Klodian Zotos. A fliste ajo sot me Vangjush Dakon, teksa ishim në komision? Znj. Felaj, është e dallueshme si drita e diellit, që ky komision ka një çrregullim total, që ditën që jeni shfaqur ju në komision. Me gjithë eksperiencën që mund të keni, nëse keni mision të shkatërroni punën e këtij komisioni, është e kotë. Arrogancë të tillë ndaj deputetëve, nuk e kam parë ndonjëherë. Nëse doni që të bëjmë këtu shoë dhe të zihemi, kjo nuk është objektiv i komisionit”-tha Këlliçi./Opinion.al
