Sajti më i njohur në botë për futbollin, “Goal.com“, ka goditur me karikaturën e sotme, e cila i dedikohet sulmuesit portugez, Cristiano Ronaldo. Karikaturisti i famshëm, Omar Momani, është frymëzuar nga një deklaratë e fundit e ish-mbrojtësit të Manchester United-it, Gary Neville, për të bërë një krijim shumë domethënës. Në qendër të pikturës është një makineri gjigante, e cila ka shndërruar yllin aktual të Real Madrid-it në një njeri krejt tjetër. Kur Cristiano u transferua nga Sporting në “Old Trafford”, ai ishte i dobët, jo me sjellje “të përpunuara” dhe një adoleshent tipik. Në Manchester ai u bë burrë muskuloz, i fortë, i maturuar dhe gati për të realizuar synimin e vendosur që në fëmijëri: të bëhet lojtari më i mirë në botë.
“Në atë dhomë të madhe Cristiano Ronaldo është bërë burrë”, – ka thënë Neville. “Për dy ose tre vite është keqtrajtuar dhe masakruar dhe kjo e ka bërë më të fortë dhe e ka ndihmuar të bëhet kampioni që është sot. Edhe pse ka provuar shijen e takave tona gjatë stërvitjeve, të gjithë ne e kemi ndihmuar shumë në atë periudhë. Vinte 30 minuta para kohe në stërvitje dhe largohej një orë më vonë. Në 15 vite unë nuk kam parë kurrë asnjë që ta bëjë për ditë këtë, në çdo stërvitje, si Cristiano“, – ka shtuar 41-vjeçari anglez.
