Eksperti i kriminalistikës, Ervin Karamuço, ka publikuar në rrjetet sociale, rastin e një personazhi “VIP” që sipas tij frekuenton rregullisht poligonët e qitjes.
Karamuço bën me dije se ky personazh shumë i njohur i showbizz-it, vendos mbi shënjestër fotografinë e vjehrrës së saj.
Në një intervistë në abc news eksperti i kriminalistikës nuk e bëri të ditur emrin e personazhit në fjalë por theksoi se ai që është për t’u shqetësuar në këtë rast është fenomeni.
“Personi që vijon me këto lloj sjelljesh duhet të ndalojë…Unë i frekuentoj shpesh këto ambiente, aty kam marrë vesh, që ka pasur një personazh shumë të njohur të showbizz-it. E kam marrë si shkaka, por më pas ma ka konfirmuar një gazetare e kronikës. Unë jam shqetësuar shumë.”
Teksa sjell në vëmendje ngjarjen e Roskovecit, ku vjehrri vrau bashkëjetuesen e djalit, Karamuço thotë se problemet në familje nuk duhet t’i marrim si fenomene që shqetësojnë vetëm rrethet tranzitore rurale, por ato fare mirë mund të gjenden mes nesh.
“Merr vesh që në ekranet e Tiranës dalin njerëz që mund të degradojnë në problematika të rënda….Doja të dërgoja një sinjal publik që sytë duhet të kthehen edhe te njëri-tjetri. Të ruajmë njëri-tjetrin që të mos kemi kështu çrregullimesh.”
Më tej Karamuço vijoi deklaratën duke thënë: “…Kjo kthehet në opsesion… ta shprehësh me armë zjarri është një fazë disi alarmante. Nuk e dallojmë dot më pas nëse kjo qëllon për t’u qetësuar emocionalisht apo qëllon në formë testi që ta provojë në një ambient tjetër.”
