Ministri i Brendshëm Saimir Tahiri ka premtuar shpërblim për grupin e Policëve që zbardhën dy grabitjet e bankave dhe vunë në pranga autorët e tyre. Në një prononcim pak minuta pas mbledhjes në Drejtorinë e Policisë së Tiranës, Tahiri ka falënderuar punonjësit e policisë që morën pjesë në operacion dhe që punuan gjatë këtyre ditëve për zbardhjen e ngjarjes.
“Sot është një ditë si të gjithë të tjerat për Policinë e Shtetit. Ku për fat të keq përtej sulmit e baltës që është hedhur ndaj policisë i kemi treguar qytetarëve shqiptarë se jemi në shërbim të tyre. Falënderoj efektivët që punuan në mënyrë të palodhur këto ditë. Ju pata thënë bëni durim. Dua të falënderoj të gjithë qytetarët për besimin tek Policia e Shtetit dhe të gjithë ata që me mosbesimin e tyre na kanë nxitur të punojmë më mirë. Kjo është policia që duam dhe energjia për Shqipërinë që duam. Thirrje për ata që sulmojnë Policinë e Shtetit, ata që janë kundër policisë janë ajo pakicë e vogël që nuk duan vettingun. Janë shumë pak për të na bërë rrugën e vështirë dhe shumë pak për të ulur besimin e qytetarëve tek policia”, tha Tahiri.
A do ketë shpërblim grupi i policisë që zbardhi ngjarjen?
Unë nuk para premtoj kur nuk e mbaj, por besoj se po.
Ku kanë shkuar lekët e grabitjes së parë?
E rëndësishme është që policia e Shtetit ka bërë gjithçka për të identifikuar autorët. Disa të arrestuar, shumë pak në kërkim. Sot Policia e Shtetit është vija ndarëse mes Shqipërisë që duan Shqiptarët dhe Shqipërisë së disave që duan ta mbajnë peng. Është shumë e rëndësishme t’u tregojmë shqiptarëve që me besimin e tyre bëjnë që Policia e Shtetit të jetë edhe më profesionale.
Edhe Drejtori i Përgjithshëm i Policisë së Shtetit Haki Çako tha se është bërë një punë intensive për zbardhjen e dy grabitjeve.
“Pas një pune intensive të palodhur u finalizua me sukses operacioni duke vënë para përgjegjësisë autorëve të disa grabitjeve të ndodhura. Është një punë shumë e mirë falë angazhimit të të gjitha strukturave. S’më mbetet gjë tjetër veçse t’i falënderoj për përkushtimin”, tha Çako.
