Policia ka zhvilluar kontrolle në Vlorë me qëllim kapjen e personave në kërkim dhe të atyre që qarkullojnë me armë zjarri apo lëndë narkotike.
Bëhet me dije se në lagjen “Pavarësia”, oficerët e Policisë i kanë bërë shenjë ndalimi një automjeti tip “Toyota”, pasi kishin dyshime se në të qarkullonin spersona me precedent kriminal.
Drejtuesi i automjetit nuk i është bindur urdhrit për të ndaluar dhe është larguar me shpejtësi me automjet, bashkë me pasagjerët, duke rrezikuar jetën e punonjësve të Policisë.
Ndërkaq, efektivët janë vënë në ndjekje të automjetit tip “Toyota”, me qëllim identifikimin dhe kapjen e shtetasve që qarkullonin me këtë automjet.
Si rezultat i veprimeve hetimore, u bë i mundur identifikimi i këtyre personave dhe me miratim të organit të procedurës u ushtruan kontrolle, në ambiente të ndryshme dhe në banesat e tyre, me qëllim kapjen e tyre dhe sekuestrimin e sendeve të kundërligjshme, nisur nga informacionet e siguruara përmes inteligjencës informative se këta shtetas ishin pjesëtarë të një grupi kriminal.
Në vijim policia lokalizoi dhe arrestoi në flagrancë njërin prej 5 personave që qarkullonin me automjetin tip “Toyota”, shtetasi D. K., 29 vjeç, banues në Vlorë.
Gjithashtu, u shpallën në kërkim shtetasit I. H., 30 vjeç, O. K., 33 vjeç, E. H., 32 vjeç dhe K. I., 31 vjeç, banues në Vlorë.
Gjatë kontrollit të ushtruar në banesën e shtetasit O. K. dhe në biznesin (servis automjetesh) e shtetasit D. K., shërbimet e Policisë gjetën dhe sekuestruan veshje (uniforma) dhe radio si të Policisë, 1 jelek antipulmb, targa automjetesh të dyshuara të vjedhura, një shumë parash, municion luftarak, dhe sende të tjera, që dyshohet se i shërbenin veprimtarisë së grupit kriminal në të cilin bënin pjesë këta shtetas.
Ndërkaq, vijojnë kontrollet për kapjen e 4 shtetasve të shpallur në kërkim.
