Kanadaja po regjistron rritjen më të madhe të rekrutimit ushtarak në tre dekadat e fundit, ndërsa qeveria po investon miliarda dollarë në mbrojtje dhe tensionet globale po shtojnë interesin e qytetarëve për t’iu bashkuar ushtrisë.
Pas vitesh kritikash për financim të pamjaftueshëm dhe mungesë personeli, Forcat e Armatosura Kanadeze po përjetojnë një kthesë të rëndësishme. Vetëm dy vjet më parë, një ish-ministër i mbrojtjes paralajmëronte se ushtria ndodhej në një “spirale vdekjeprurëse” për shkak të krizës së rekrutimit.
Sipas analistëve, rritja e aplikimeve nisi në vitin 2022, pas pushtimit të Ukrainës nga Rusia, ndërsa konfliktet globale dhe pasiguria gjeopolitike kanë ndikuar në perceptimin e sigurisë kombëtare.
Charlotte Duval-Lantoine, studiuese në Institutin Kanadez të Çështjeve Globale, tha se njerëzit kanë tendencë të bashkohen me ushtrinë kur ndiejnë se bota po bëhet më e pasigurt.
Sipas BBC, një tjetër faktor që po ndikon në rritjen e rekrutimit është papunësia e lartë tek të rinjtë në Kanada, e cila në mars arriti afro 14%. Për shumë të rinj, ushtria po shihet si një mundësi për siguri ekonomike, paga më të mira dhe stabilitet afatgjatë.
Qeveria e kryeministrit Mark Carney ka vendosur modernizimin ushtarak në qendër të agjendës së saj. Në mars, Kanadaja arriti për herë të parë që nga fundi i viteve 1980 objektivin e NATO për të shpenzuar 2% të Prodhimit të Brendshëm Bruto në mbrojtje.
Shpenzimet ushtarake pritet të kalojnë 63 miliardë dollarë kanadezë brenda një viti, ndërsa qeveria është zotuar të investojë në rritjen e pagave të ushtarëve, blerjen e pajisjeve të reja, modernizimin e bazave ekzistuese dhe ndërtimin e infrastrukturës së re në Arktik.
Rritja e nacionalizmit në vend ka ndikuar gjithashtu në këtë trend. Deklaratat e presidentit amerikan Donald Trump, i cili e quajti Kanadanë “shteti i 51-të”, janë parë nga shumë kanadezë si kërcënim ndaj sovranitetit të vendit.
Megjithatë, ekspertët paralajmërojnë se ushtria kanadeze mbetet ende prapa aleatëve të saj kryesorë. Richard Shimooka nga Macdonald-Laurier Institute tha se kapaciteti aktual operacional i ushtrisë është i kufizuar dhe se do të duhen të paktën pesë deri në dhjetë vjet për të parë përmirësime të dukshme.
Sipas tij, Forcat e Armatosura Kanadeze mund të dislokojnë vetëm disa mijëra trupa dhe një numër të kufizuar avionësh luftarakë, shumë më pak se disa prej aleatëve kryesorë të NATO-s.
