Ministri i Mbrojtjes, Niko Peleshi ka reaguar pas megaoperacionit të Policisë së Shtetit, e cila zbuloi një parcelë me kanabis në repartin ushtarak në Zall Herr.
Përmes një postimi në rrjetet sociale Peleshi njoftoi se ka pezulluar nga detyra përgjegjësit e repartit.
Ai thotë se dënon me forcë aktivitetin e paligjshëm, teksa lajmëron se janë asgjëduar 125 bimë kanabis.
“Bashkëpunimi mes Policisë së Shtetit dhe Policisë Ushtarake, bëri të mundur evidentimin dhe më pas asgjësimin e 125 bimëve kanabis, të cilat ishin kultivuar në një zonë të pyllëzuar, në territorin e zonës ushtarake të Zall Herrit.
Menjëherë janë pezulluar nga detyra të gjithë personat përgjegjës. Dënojmë me forcë çdo aktivitet të kundërligjshëm. Inkurajojmë organet ligjzbatuese të bëjnë detyrën në çdo rast!”, shkruan Peleshi.
Kujtojmë që gjatë këtij operacioni u arrestuan për shpërdorim të detyrës, 3 punonjës të repartit ushtarak, shtetasit:
– Gramoz Mullai, 52 vjeç, me detyrë Shef Seksioni i Sigurisë;
– Rustem Koçi, 25 vjeç, me detyrë Specialist për Zbulimin;
-Gentian Zhurda, 45 vjeç, me detyrë Specialist Sigurie.
