Ish-kryetari i Bashkisë së Vorës, Agim Kajmaku është në kërkim policor dhe prej disa ditësh ai ndodhet në arrati.
Ndërkohë, lidhur me këtë rast, mësohet se Prokuroria e Krimeve të Rënda i ka dërguar një shkresë Dhomës Kombëtare të Noterisë, ku ka urdhëruar të gjithë noterët në vend të njoftojnë, nëse Kajmaku paraqitet pranë tyre.
“Noterët të njoftojnë policinë, nëse para tyre paraqitet Agim Kajmaku. Nëse nuk njoftojnë, noteri do të mbajë përgjegjësi ligjore”, thuhet në shkresën e Prokurorisë.
Shkresa e Prokurorisë që mban firmën e drejtuesit të seksionit, Kolë Hysenaj, i është shpërndarë të gjthë zyrave të noterisë në Shqipëri.
Kajmaku është shpallur në kërkim, pas shkarkimit si kryebashkiak i Vorës nga KQZ, pasi u vërtetuan akuzat e opozitës se ka qenë i dënuar në Greqi për falsifikim parash, dhe këtë gjë nuk e kishte deklaruar në formularin e Dekriminalizimit.
Urdhri prokurorisë lidhet me dyshimin se Kajmaku mund të paraqitet në noteri për t’i dhënë prokurë avokatit për ta përfaqësuar. Mbi ish-krybashkiakun e Vorës rëndojnë akuzat për shpërdorim detyre, falsifikim formularësh dhe kryerje të funksionit pas shkarkimit nga detyra.
Kujtojmë që, Kajmaku pas shkarkimit nga detyra, ka firmosur largimin nga detyra të dy nënkryetarëve të bashkisë së Vorës, duke emëruar një tjetër person./ Opinion.al
