Presidenti i SHBA, Joe Biden ka uruar Shqipërinë me rastin e 109-vjetorit të Pavarësisë. Urimi i është dërguar, Presidentit të Republikës, Ilir Meta.
Teksa përkujton tridhjetëvjetorin e rivendosjes së marrëdhënieve diplomatike Shqipëri-SHBA, Biden thekson se ato që Shqipëria ka arritur që nga viti 1991 janë mbresëlënëse.
Biden nënvizon se Shtetet e Bashkuara të Amerikës do të vazhdojnë të mbështesin Shqipërinë në forcimin e institucioneve demokratike, përmbushjen e reformave në sektorin e drejtësisë, luftën ndaj korrupsionit për të siguruar një klimë transparente dhe të barabartë sipërmarrjeje për investitorët shqiptarë dhe ata të huaj.
Mesazhi i Presidentit të SHBA
“I dashur Zoti President,
Në Ditën tuaj të Pavarësisë, e uroj Shqipërinë në emër të popullit amerikan!
Këtë vit ne përkujtojmë tridhjetëvjetorin e rivendosjes së marrëdhënieve tona diplomatike dhe festojmë një miqësi të mbështetur në lidhjet e familjes dhe historisë, si dhe mbi vlerat tona demokratike dhe përkushtimin ndaj të drejtave të njeriut, që ndajmë sa bashku.
Ato që Shqipëria ka arritur që nga viti 1991 janë mbresëlënëse.
Sot, Shqipëria është një vend mik i ngushtë i Shteteve të Bashkuara të Amerikës, një aleat i rëndësishëm i NATO-s, dhe një anëtare e sapofutur në Këshillin e Sigurisë të Organizatës së Kombeve të Bashkuara.
Gjithashtu Shqipëria po i tregon botës mikpritjen e saj të madhe duke pritur si dhe duke iu dhënë një strehim të sigurt afganëve në rrezik.
Shtetet e Bashkuara të Amerikës do të vazhdojnë të mbështesin Shqipërinë ndërsa ju forconi institucionet tuaja demokratike, përmbushni reformat e rëndësishme në sektorin e drejtësisë, luftoni korrupsionin për të siguruar një klimë transparente dhe të barabartë sipërmarrjeje për investitorët shqiptarë dhe ata të huaj, si dhe teksa ndiqni të ardhmen tuaj europiane.
Marrëdhënia jonë dypalëshe në rritje të tregtisë dhe investimeve, sidomos në sektorin e rëndësishëm energjetik, është kyçe për rimëkëmbjen e Shqipërisë si dhe për thellimin e partneritetit tonë.
Dëshiroj t’i uroj popullit shqiptar, edhe në emër të të gjithë amerikanëve, një Ditë të paqtë të Pavarësisë!
Shtetet e Bashkuara të Amerikës janë krenare ta quajnë Shqipërinë një vend mik, partner dhe aleat”.
