Britania e Madhe ka hyrë në javën e dytë të karantinës për shkak të koronavirusit. Krahas ankthit nga virusi i rrezikshëm, vendi po përballet edhe me një vale të rritur të dhunës e krimit në familje.
Kështu, 9 persona kanë humbur jetën duke tronditur jo pak opinionin publik. Mediat britanike raportuan se trupat e pajetë të 4 personave u gjetën në një shtëpi në Sussex, pas lajmit për një grua të vrarë nga burri i saj në Uellsin Jugor.
Po ashtu, një infermiere u gjet e vrarë me thikë në South Yorkshire ndërsa 3 anëtarë të një familje u gjetën të vdekur në një akt vrasje e më pas vetëvrasje nga kryefamiljari.
Ngjarjet e rënda kanë ndodhur pas javës së parë së izolimit, pas situatës së krijuar nga koronavirusi.
Kujtojmë se psikologët dhe ekspertët e shëndetit mendor kanë paralajmëruar një sërë ndryshimesh sociale që do të ndodhin për shkak të izolimit.
Disa prej tyre janë numri i lartë i divorceve, rritja e numrit të lindjeve, ndërsa fatkeqësisht në Britani ankthi nga karantina po prodhon dhunë e krim brenda familjes./Opinion.al
