Kufomat e femrave në Kinë janë duke u marrë, pra duke u zhvarrosur, duke u shitur për mijëra euro, në një treg me një kërkesë që vjen gjithnjë e duke u rritur.
Në pjesët e prapambetura të vendit mbizotëron bindja se është “fat i keq” nëse një njeri vdes i pamartuar.
Me qëllim të parandalimit të fatit të keq, familjet janë duke marrë trupa të femrave për beqarët e tyre, duke i lidhur kufomat me tela, duke i veshur dhe duke i varrosur më pas afër mashkullit.
Vjedhjet e kufomave
Një numër gjithnjë e më i madh i kufomave të femrave janë duke u vjedhur nga varrezat, për t’u përdorur në ceremoninë e “martesës së fantazmave”, duke i shqetësuar pa masë të gjallët, të cilët duan me çdo kusht që ta gjejnë të vdekurin e tyre. Të paktën rreth 40 kufoma janë raportuar si të zhdukura, apo të vjedhura gjatë tri viteve të fundit në Qarkun jugor Shanxi Hongtong, thotë Lin Xu, zëvendësdrejtor i Departamentit policor të këtij qarku.
Tradita e cila praktikohej në Kinën mesjetare, ishte ndaluar nga udhëheqësi Mao, kur kishte marrë pushtetin në vitin 1949. Pas ndalesës, fshatarët i varrosnin të dashurit e tyre me kukulla, apo me vizatime të nuses në letër. Por, me ngritjen e standardit, praktika e përdorimit të kufomave të vërteta është kthyer në disa zona rurale të provincës Shanxi, të provincës veriore Henan dhe në provincën Shaanxi.
Chang Sixin, zëvendësdrejtor i Shoqatës kineze për literaturë dhe art popullor, tha se tani janë formuar edhe agjenci për gjetjen e nuseve të vdekura për beqarët e vdekur. Por, ato agjenci e kanë të pamundur që t’i plotësojnë të gjitha kërkesat në rritje. Kufomat e freskëta shiten me një çmim më të madh se 13000 euro.
Fajin e kanë pleqtë e fshatit
Një njeri, i quajtur Jing Gouzi, i cili e bleu një kufomë femër për ta varrosur afër vëllait të tij të madh, të pamartuar, tha se kishte menduar që ta përdorte një kukull, në vend të kufomës, por se pleqtë e katundit i kishin thënë se, nëse donte t’i ikte fatit të keq, atëherë duhej ta përdorte një kufomë të vërtetë.
Sipas ligjit penal të Kinës, ata që vjedhin apo zhvarrosin kufomat, mund të dënohen deri në tre vjet me burg. Por, vjedhja e kufomave është vështirë për t’u hetuar, meqë është vështirë të gjenden dëshmitë, thotë Lin//Kosova Sot Online.
