Një grua shqiptare është ngacmuar seksualisht dhe është sulmuar brenda zyrës së emigracionit në një komisariat policie në Itali.
Sipas mediave lokale italiane, ngjarja ndodhi në Pistoia. Autor i dyshuar i ngjarjes është një senegalez, i cili akuzohet për tentativë përdhunimi.
Fillimisht ai mësohet se kishte insistuar që gruaja ta ndiqte në tualet, por kur ajo refuzoi, ai e kapi nga krahu dhe u përpoq ta tërhiqte me forcë.
Policët e zyrës së emigracionit janë vënë në dijeni të asaj që po ndodhte dhe kanë ndërhyrë menjëherë në mbrojtje të gruas, duke arritur me shumë vështirësi ta shkëputin nga duart e sulmuesit.
Burri i është nënshtruar masës së arrestit shtëpiak dhe është në dispozicion të organeve gjyqësore.
Sakaq, një prej policëve që ndërhyri për të shpëtuar gruan, iu desh të drejtohej në urgjencë pasi pësoi lëndime në shpatull dhe në dorën e majtë.
