Teksa hetimet për vrasjen e ish-policit Santiago Malko duket se kanë mbetur në vend, të tjera detaje mësohen nga jeta e tij.
26-vjeçari ishte një person nën hetim për disa ngjarje të rënda kriminale në Tiranë dhe Durrës, si edhe i dënuar për armëmbajtje pa leje dhe plagosje me dashje, por prej 9-muajsh punonte si inspektor pyjesh në Dajt.
Prej Janarit të 2019-së, ai nuk ishte paraqitur asnjë ditë të vetme në punë, ndërkohë që pagesat kryheshin normalisht në llogarinë e tij bankare.
Për këto arsye po hetohet edhe praktika e ndjekur në rastin Malko, për t’u punësuar në administratën shtetërorë pasi dëshmia e penalitetit është kriteri kryesor. Ajo duhet të jetë e pastër për aplikuesit për një vend pune ose personi duhet të jetë i rehabilituar pas dënimit të kryer.
Dyshohet se Malko ka falsifikuar dosjen e tij për dëshminë e penalitetit, duke e deklaruar atë të pastër në drejtorinë e burimeve njerëzore në Inspektoriatin e Mjedisit dhe Pyjeve.
Policia e ka referuar dosjen për ekzekutimin e ish-efektivit pa autor në Prokurorinë e Tiranës. Grupi hetimor ka sekuestruar pamjet e më shumë se 40 kamerave të sigurisë të bizneseve në të gjithë gjatësinë e rrugës “Xhenfize Keko” për të bërë të mundur zbulimin dhe identifikimin e autorëve në vrasjen e 26-vjeçarit.
Po kështu rezultoi se në krim u përdor vetëm një armë zjarri tip automatik Kallashnikov model 54, ndërsa arma e tjetër nuk ka kryer qitje sipas ekspertëve të kriminalistikës./Opinion.al
