SPAK ishte një nga institucionet më të shumëpritura për tu ngritur pas Reformës në Drejtësi, por një ditë pas ngritjes së tij mesa duket puna do të paraqitet e vështirë për Prokurorinë e Posaçme që pritet të hetojë nivelet më të larta të korrupsionit dhe krimit të organizuar.
Përfaqësuesit e lartë politikë mesa duket e kanë të pamundur të mos ndikojnë në punën e institucioneve të pavarura të cilat kanë qenë konstant nën rrezikun e presionit politik.
I pyetur rreth nisjes së punës së SPAK, kreu i grupit parlamentar të Partisë Socialiste, Taulant Balla dha disa udhëzime se nga duhet të niste puna e SPAK. Ai bëri të ditur nga Elbasani se është informuar rreth 140 dosjeve të para që do të hetojë Prokuroria e Posaçme dhe bëri kërkesë që të merret në konsideratë çështja e privatizimit të OSSH pasi sipas tij është ‘e papranueshme’ që kjo çështje të mbyllet.
“Jam informuar që një pjesë e më shumë se 140 dosjeve që do të jenë puna e parë e prokurorëve, dua të ndaj me ju faktin që një ndër dosjet që unë do i kërkoja SPAK-ut duhet të jetë edhe kallëzimi i bërë nga ana e Kuvendit të Republikës së Shqipërisë lidhur me gjetjet e raportit të komisionit hetimor për privatizimin e OSSH ku janë kallëzuar autoritete të larta të qeverisë së asaj kohe, filluar nga kryeministri Sali Berisha, jemi informuar nga ana e prokurorisë që prokuroria i është drejtuar gjykatës për ta mbyllur këtë çështje. Është e papranueshme që kjo çështje të mbyllet. Kjo çështje duhet hetuar nga prokuroria speciale anti korrupsion dhe do i kërkoja gjykatës që ta kthejë mbrapsht dhe kjo dosje të jetë një prej dosjeve që duhet të shqyrtohet nga SPAK-u. Jemi informuar që gjykata këtë çështje do ta shqyrtojë më datë 27 dhjetor, por është e pakuptueshme tashmë që kemi ngritur këtë njësi speciale për të luftuar korrupsionin që kjo dosje të mbyllet pa u hetuar”, tha Balla.
Sot SPAK nisi zyrtarisht punën pasi u prezantuar dhe drejtuesi i parë i zgjedhur nga KLP, Arben Kraja. Në fjalën e tij të parë ai tha se “tani është koha për punë, jo për llafe, kemi shumë punë për të bërë”. Mesa duket puna e ‘dorës së hekurt’ kundër korrupsionit nuk do të jetë vetëm në hetimin e çështjeve por edhe në përballimin e presioneve të jashtme. /Opinion.al
