Ushtria indoneziane nuk do të ketë më kriter virgjërinë për rekrutimin e femrave.
I është dhënë fund kështu, një praktike të diskutueshme të testeve të virgjërisë tek gratë që aplikojnë për t’u bërë kadete, tha shefi i shtabit të ushtrisë. Ky veprim është mirëpritur nga aktivistët që kanë bërë fushatë të gjatë kundër kësaj praktike.
Procedura që njihet si “testet me dy gishta”, ku mjekët kontrollojnë himenin e femrave që rekrutohen në ushtri për të provuar virgjërinë e tyre, ishte sistematike, abuzive dhe mizore, sipas Organizatës të të Drejtave të njeriut (HRW) me qendër në Nju Jork, e cila kreu hetime në 2014 dhe 2015 dhe bëri thirrje që kjo praktikë të përfundonte.
Ushtria më parë tha se testet ishin të rëndësishme në përcaktimin e moralit të grave që janë pjesë e ushtrisë. Ndërsa Organizata Botërore e Shëndetit ka thënë se testet “nuk kanë vlefshmëri shkencore” pasi shfaqja e një himeni nuk ishte një tregues i besueshëm i kryerjes së marrëdhënieve seksuale.
Shefi i shtabit të ushtrisë, gjenerali Andika Perkasa iu konfirmoi gazetarëve fundin e praktikës dhjetëvjeçare. Ai shtoi se procesi i përzgjedhjes për në ushtri për rekrutët meshkuj dhe femra duhet të jetë i barabartë.
Të mërkurën zëdhënësi i ushtrisë Julius Widjojono, tha “si burrat ashtu edhe gratë i nënshtrohen të njëjtave ekzaminime”.
Grupet e të drejtave të njeriut përshëndetën njoftimin se ushtria kishte pushuar praktikën.
“Asnjëherë nuk kishte nevojë për teste,” tha Andy Yentriyani, kreu i Komisionit Kombëtar për Dhunën ndaj Grave.
Ndërsa, Andreas Harsono, studiues indonezian tha se ishte “gjëja e duhur për të bërë”, duke shtuar se praktika ishte “degraduese, diskriminuese dhe traumatike”./Opinion.al
