Partia Demokratike ka vijuar akuzat për kontratat e konçesioneve të inceneratorëve. Në një deklaratë për mediat nga vendi ku pritet të ndërtohet inceneratori i Tiranës, ish-deputetja Jorida Tabaku e konsideroi atë një histori vjedhjeje, korrupsioni dhe abuzimi me pushtetin, në stilin mafioz të menaxhimit të mbetjeve.
“Inceneratori i Tiranës është një histori e pastër vjedhjeje, korrupsioni, abuzimi me pushtetin, në stilin mafioz të menaxhimit të mbetjeve.Kompania që ka marrë në menaxhim inceneratorin e Tiranës u krijua vetëm një ditë përpara se ta merrte këtë koncesion. Me një kapital prej 100 mijë lekësh, ajo mori një koncesion prej 130 milionë eurosh. Kostot e operimit janë rreth 300 milionë euro, ndërkohë që do të gjenerojë të ardhura nga shitja e energjisë në 135 milionë euro. Këto shuma marramendëse, këto shifra të jashtëzakonshme, janë të pakonceptueshme për qytetarët, që sot vuajnë për bukën e gojës dhe për bizneset që ulin qepenat.”, deklaroi ish-deputetja e PD.
Tabaku akuzon Bashkinë e Tiranës se rriti me 30% tarifën e pastrimit për të paguar kompaninë në parajsë fiskale, ndërkohë që përgjegjësit e këtij korrupsioni janë Rama, Veliaj dhe Ahmetaj.
“Kostot e këtij inceneratori po i paguajnë qytetarët e Tiranës. Paguajnë nga buxheti i shtetit çdo ditë. 25 milionë euro janë paguar për atë karabinë atje, e për atë mal plehrash, ndërkohë që do të paguhen edhe 400 milionë euro të tjera. 30% janë rritur tarifat e pastrimit për qytetarët e Tiranës, ndërkohë që edhe vetë Bashkia e Tiranës përveçse jep pagesa direkte për inceneratorin, paguan 29 euro për tonë mbetjesh që depoziton këtu. Kjo histori e pastër korrupsioni dhe vjedhje ka një emër. Edi Rama, Arben Ahmetaj, Erjon Veliaj”, u shpreh Jorida Tabaku.
Partia Demokratike ka analizuar të gjitha dosjet e këtyre kontratave koncesionare dhe do t’i çojë ato përpara drejtësisë, tha Tabaku, duke i konsideruar si vjedhjen më të pashoqe në Shqipëri dhe abuzimi më i madh në këto 30 vite.
“Jemi këtu për të denoncuar se si njëkohësisht, bashkë me qytetarët e Tiranës që paguajnë një tarifë më të lartë pastrimi, edhe Bashkia e Durrësit është detyruar që të derdhë këtu mbetjet. Këto furgona pastrimi që vijnë pas meje, që vijnë nga Durrësi dhe i derdhin këtu mbetjet, i kushtojnë qytetarëve të Durrësit 14 milionë euro nga buxheti i tyre dhe po ashtu tarifat e pastrimit në qytetin e Durrësit do të rriten. Kjo histori vjedhje, kjo histori korrupsioni, kjo histori e cila është e pashoqe për Shqipërinë, një nga abuzimet më të mëdha të këtyre 30 viteve, do të ketë të vendosur përpara drejtësisë pas 25 prillit. Ndërkohë që sot jemi këtu për të dokumentuar atë që kemi vite, kemi muaj që denoncojmë.
Marrin paratë publike, marrin paratë e shqiptarëve ndërkohë që këtu nuk ka absolutisht asnjë investim. Kjo kompani e cila është në parajsat fiskale, një kompani guaskë në të cilën fshihet Arben Ahmetaj dhe Edi Rama, është shembulli më i mirë se si këta kanë punuar dhe operuar për tetë vite. Se si kanë vjedhur buxhetin e shtetit, se si kanë vjedhur taksat e shqiptarëve, se si sot duan të përpiqen që të na gënjejnë dhe mashtrojnë.
Qytetarët e Tiranës, Durrësit dhe të gjithë Shqipërisë, më 25 prill do t’i thonë stop vjedhjes edhe për këtë korrupsion që është këtu pas krahëve tona”, përfundoi ish-deputetja demokrate./ Opinion.al
