Presidenti Ilir Meta del të martën në një konferencë urgjente pas vendimit të Kolegjit Zgjedhor. Burime nga Presidenca bëjnë të ditur se nesër në orën 08:00, Presidenti do të dalë në një konferencë shtypi duke marrë shkasë nga vendimi i sotëm i Kolegjit dhe kriza e rëndë politike në vend.
Kolegji Zgjedhor ka rrëzuar këtë të hënë kërkesën e Partisë Uniteti Kombëtar për t’u çregjistruar nga zgjedhjet e 30 qershorit, duke lënë kështu në fuqi datën 30 qershor për mbajtjen e zgjedhjeve vendore.
Pas zhdekretimit të kësaj date nga Presidenti Meta, partia e drejtuar nga Idajet Beqiri i kërkoi fillimisht Komisionit Qendror të Zgjedhjeve që ta çregjistronte nga kjo garë, duke e hequr PUK dhe nga fleta e votimit. Kërkesë kjo që nuk u pranua nga KQZ dhe për këtë arsye Beqiri e ankimoi pranë Kolegjit.
Edhe pse nuk u shpreh drejtpërdrejt për dekretin e Presidentit, përmes këtij vendimi, Kolegji Zgjedhor i dha përgjigje dhe debatit mes Kuvendit dhe Presidentit për ligjshmërinë ose jo të dekretit të kreut të shtetit, për anulimin e zgjedhjeve.
Presidenti i Republikës Ilir Meta dhe opozita pretendojnë se dekreti për anulimin e zgjedhjeve është kushtetues dhe duhet të zbatohet nga të gjithë, ndërsa shumica e konsideron antikushtetues dhe për rrjedhojë ka nisur procedurat për shkarkimin e Presidentit./Opinion.al
