Ministria e Infrastrukturës ka konfirmuar se procedurat për dhënien me koncesion të Aeroportit të Vlorës do të nisin nga e para. Sipas ministrisë , afati i ligjit, që autorizonte qeverinë për negocimin e marrëveshjes me konsorciumin turk prej 3 kompanish që kishte paraqitur ofertë konkrete, ka përfunduar dhe nuk ka firmosje kontrate.
Ndërkohë, pas largimit të kompanisë turke, është duke u përgatitur një tjetër garë ndërkombëtare për dhënien me koncesion.
Qeveria është shprehur më herët se që ndërtimi, operimi dhe mirëmbajtja e Aeroportit të Vlorës të jepet me koncesion për 35 vite.
Ministria e Infrastrukturës, është shprehur se investitorët janë shumë të interesuar për aeroportin e Vlorës, prandaj për këtë arsye dhënia me koncesion do të bëhet përmes një gare ndërkombëtare brenda kuadrit ligjor.
Procedurat e ndjekura dhe vet propozimi për koncesionin e aeroportit në Akërni të Vlorës patën shkaktuar shumë debate. Skema parashikonte një nivel dysheme të ardhurash vjetore, sipas një formule koncesioni të ngjashme me atë të mirëmbajtjes së rrugës Durrës-Kukës. Nëse kjo e ardhur nuk arrihet nga shfrytëzimi i aeroportit, atëherë qeveria i paguante koncesionarit diferencën nga buxheti i shtetit.
Deri më tani ende nuk dihen kompanitë të cilat do të garojnë për aeroportin e Vlorës, ndërsa synimi i qeverisë është garantimi që shpenzimet nga buxheti i shtetit të jenë minimale./ Opinion.al E.Xh.
