Është identifikuar autori i krimit të ndodhur në Tiranë, ku pas të shtënave me armë zjarri vrau 29-vjeçarin Jurgen Duka.
Mësohet se autori është Arbër Sula 27 vjeç, banues në Sauk.
Sipas policisë 27-vjeçari është punonjës policie, me detyrë agjent krimesh në DVP Dibër.
Gjatë momentit të ngjarjes, mësohet se ai ka qenë jashtë shërbimi. Siç mund të shihet edhe në videon e mëposhtme dy të rinjtë shihen pranë njëri-tjetrit në banakun e marketit dhe më pas konfliktohen verbalisht.
Në një moment përplasje degjeneron në konflikt fizik, e deri në përdorimin e armës nga Sula, që rezulton fatale për 29-vjeçarin Duka.
Mësohet se gjatë një kontrolli që grupi hetimor iu bëri rrobave të Jurgen Dukës ka gjetur dhe sekuestruar një sasi prej 2.8 gramë lëndë narkotike e dyshuar kokainë, ndërsa në vendin e ngjarjes janë sekuestruar një gëzhojë pistolete dhe një DVR me pamjet filmike të ngjarjes.
Autori i ngjarjes është arratisur dhe policia aktualisht po punon për kapjen dhe arrestimin e tij./Opinion.al
