Deklaratës së eurodeputetit Knut Fleckenstein se ishte i habitur dhe mbi të gjitha i zhgënjyer nga Monika Kryemadhi, kjo e fundit i është përgjigjur me një status në Facebook.
Kryemadhi ka shkruar shkurt: “Shqipëria është shtëpia e shqiptarëve. Ky është misioni ynë, asnjë hap pas.” Edhe pse një replikë jo e drejtpërdrejtë për fjalët e raportuesit të Shqipërisë në Parlamentin Europian, statusi i Kryemadhit pak minuta pas mbarimit të konferencës së delegacionit europian, është një mesazh i qartë se opozita e ka marrë vendimin e saj për aksionin politik dhe nuk do të ndikohet nga fjalët e ndërkombëtarëve.
Sot Fleckenstein tha se kishte mbetur i habitur dhe i zhgënjyer nga qëndrimi i Monika Kryemadhit. “Unë u befasova shumë, u habita por edhe u zhgënjeva shumë, nga kryetarja e LSI-së, për arsye se ajo tha vetëm një fjali në fund, duke na thënë që ata e kanë marrë vendimin e tyre, se në Shqipëri duhet ndërruar pushteti dhe nëse europianët nuk e kuptojnë, nuk është problemi i tyre. Ky është një mesazh i qartë, ata në Bruksel duhet të kuptojnë se në cilën anë gjendet secili prej nesh”, tha sot Fleckenstein./Opinion.al
