Një 52-vjeçar humbi jetën në Durrës ditën e djeshme, pasi nga kamioni me të cilin po punonte, rrëshqitën disa pllaka mermeri dhe e zunë poshtë.
Lidhur me ngjarjen uniformat blu kanë arrestuar ditën e sotme shoferin e kamionit, shtetasin M. K., 62 vjeç, i cili është larguar nga vendi i ngjarjes, pa dhënë ndihmë dhe pa njoftuar Policinë.
“Në vijim të informacionit paraprak të dhënë mesditën e djeshme, se shtetasi A. K., 52 vjeç, humbi jetën për shkak se nga kamioni me të cilin po punonte, kishin rrëshqitur disa pllaka mermeri dhe e kishin zënë poshtë, ju bëjmë me dije se:
Si rezultat i hetimeve të kryera menjëherë pas ngjarjes, specialistët për Hetimin e Krimeve të Komisariatit të Policisë Durrës arrestuan në flagrancë shtetasin M. K., 62 vjeç, banues në Xhavzotaj, Durrës (shoferi i kamionit prej nga ku rrëshqitën pllakat), për veprat penale “Shkelja e rregullave të mbrojtjes në punë” dhe “Largimi nga vendi i aksidentit”.
Për këtë ngjarje dyshohet të ketë qenë shkak edhe shkelja e rregullave të mbrojtjes në punë, nga 62-vjeçari, i cili pas rrëshqitjes së pllakave mbi shtetasin A. K., është larguar nga vendi i ngjarjes, pa dhënë ndihmë dhe pa njoftuar Policinë.
Vijojnë hetimet për të provuar ligjërisht përgjegjësinë penale të shtetasit M. K”-njofton policia.
