I kërkuar për vrasje në tentativë, arrestohet kosovari në Portin e Durrësit

Policia në Durrës ka arrestuar një 61-vjeçar kosovar, pasi ishte në kërkim ndërkombëtar.

Ai u ndalua në Portin e Durrësit në tentativë për të dalë nga Shqipëria, pasi rezultoi se është në kërkim ndërkombëtar nga Bullgaria.

61-vjeçari kërkohet për vrasje në tentativë dhe vjedhje në rrethana rënduese.

“Ndalohet në dalje të Shqipërisë, një shtetas kosovar i kërkuar ndërkombëtarisht nga autoritetet në Bullgari, për tentativë për vrasje dhe për vjedhje në rrethana rënduese.

Si rezultat i intervistimeve të detajuara dhe verifikimeve të tjera të kryera me qëllim parandalimin e lëvizjes së kundërligjshme të shtetasve që janë të shpallur në kërkim, si dhe për parandalimin dhe goditjen e krimeve kufitare, Policia e PKK Port Durrës, pas shkëmbimit të informacioneve ndërmjet Interpol Tiranës dhe Interpol Sofias, ndaloi dhe arrestoi provizorisht, me qëllim ekstradimin në Bullgari, shtetasin kosovar Z. H., 61 vjeç.

Ky shtetas, i dënuar më parë në Bullgari, është shpallur në kërkim ndërkombëtar nga autoritetet e këtij shteti, pasi i është caktuar masë sigurie “Arrest në burg”, për veprat penale “Vrasja”, mbetur në tentativë, dhe “Vjedhja në rrethana rënduese”.

Vijon bashkëpunimi për ekstradimin e 61-vjeçarit, në Bullgari”, njofton policia.