Sekretari i Përgjithshëm i Partisë Demokratike Gazment Bardhi, duke publikuar pjesë nga dosja 339, eshtë shprehur se kjo dosje është vetëm maja e ajsbergut, që provon se Edi Rama është përfitues i vjedhjes së votave për zgjedhjet e vitit 2017.
“Sa më shumë fletë hapen nga dosja 339, aq më shumë zbulohet skema e blerjes së pushtetit të Edi Ramës me krimin. Zbardhja nga media e disa bisedave të tjera të Niçes famëkeq të organizatës mafioze të Avdylajve gjatë fushatës elektorale 2017, konfirmon mashtrimin elektoral të organizuar nga Edi Rama, që i dha atij të paktën 10-15 deputetë pa vullnetin e qytetarëve. Vetëm në 1 qendër votimi, në një fshat të Shijakut, janë vulosur dhe janë futur në kuti 25 fletë votimi të papërdorura. Siç thotë vartësi i Niçes, “aq tepruan”, se fitorja e Edi Ramës do të kshte qenë edhe më e thellë”, shkruan Bardhi duke publikuar zbardhjen e përgjimit.
Më tej, Sekretari i Përgjithshëm i PD-së pohon se dosja 339, e cila prej më shumë se 3 vitesh po zvarritet, lidh Avdylajt e drogës, me njerëzit e Ramës në Durrës.
“Futja në kuti e fletëve të papërdorura, votimi i emigrantëve pa ardhur në Shqipëri, blerja e votave, kërcënimi me largimet nga puna i demokratëve apo qytetarëve të paangazhuar janë të provuara nga dosja 339 si skema të përdorura nga krimi i organizuar për t’i siguruar Edi Ramës pushtetin.
Kaq sa është bërë publike nga një dosje që po zvarritet prej 3 vitesh e gjysëm, është vetëm maja e ajsbergut, që provon se Edi Rama është organizatori dhe përfituesi i një skeme kriminale për vjedhjen e zgjedhjeve parlamentare të vitit 2017. Dosja 339 është një thesar ende i pazbuluar që i lidh Avdylajt e trafikut të drogës me Edi Ramën dhe njerëzit e tij të besuar në Durrës. Llukashenko nuk ka vetëm në Minsk. Ai është edhe në Tiranë,duke drejtuar bashkë me Niçet e krimit të organizuar, qeverinë e Tiranës”, shkruan Bardhi./Opinion.al
