I dyshuari i vetëm që ka mbijetuar nga sulmet terroriste, që kanë ndodhur në nëntor të vitit 2015 në Paris, është akuzuar edhe zyrtarisht për lidhje me sulmet vetëvrasëse në Bruksel, që kanë ndodhur disa muaj më vonë.
Prokurorët federalë në Belgjikë, kanë konfirmuar raportimet e mediave se i dyshuari, Salah Abdeslam, është akuzuar për “pjesëmarrje në aktivitete të një grupi terrorist”, por nuk kanë dhënë detaje për rolin e tij në sulmet e kryera në aeroportin dhe stacionin e metros në Belgjikë më 22 mars të vitit 2016.
Nga këto dy sulme kanë vdekur 32 persona dhe janë plagosur 340 të tjerë.
Në muajin prill, një gjykatë në Belgjikë ka dënuar Abdeslamin me 20 vjet burgim për shkak të betejës së tij me armë zjarri kundër policisë në Bruksel.
Abdeslam ka lindur në Belgjikë, por ka kombësi franceze. Ai aktualisht gjendet në burg në Francë, në pritje të gjykimit për sulmet në Paris./Opinion.al
