Ziadin Sela, ka njoftuar dorëheqjen nga drejtimi i partisë opozitare, Aleanca për Shqiptarët në Maqedoninë e Veriut. Shkak për dorëheqjen është disfata e kësaj partie në zgjedhjet e 20 gushtit në Tetovë për asamblenë komunale.
Dorëheqjen Sela e njoftoi përmes një konference për shtyp, ndërsa theksoi se ka marrë këtë vendim si pasojë e rezultatit, ku ASH nuk mori asnjë vend në përbërjen e re të komunës që numëron 31 këshilltarë.
“Unë i qëndroj asaj që kam thënë që edhe gjatë fushatës, që Tetova nuk është vetëm një komunë, Tetova nuk është vetëm një qytet, është përtej kësaj, të paktën kështu duhet të jetë. Kam dëgjuar që kanë qarkulluar zëra dhe informacione nëpër portale, po është e vërtet. Unë nga ky moment jap dorëheqje të parevokueshme nga kryetari i Aleancës për Shqiptarët”, deklaroi Sela.
Ai shtoi se partia do të mbajë Kuvendin Qendror, ku pritet të emërohet kreu i ri i partisë. I pyetur nëse do të jetë kandidat për kryetar sërish, Sela tha se këtë nuk e lejon statuti i partisë.
