Nga Reldar Dedaj
Pas tejkalimit të provës së propozimit të ministrave të rinj, të cilët përfaqësojnë Partinë Demokratike, Lulzim Basha shumë shpejt u përball me një tjetër sfidë: Shpalljen e listës së kandidatëve për deputet. Zyrtarizimi i listave konsiderohet si një nga momentet më delikate për krerët e dy partive të mëdha, pasi ky proces krijon natyrshëm hatërmbetje, turbullira, rebelime dhe përçarje në parti. Për shumëkënd, lista e emrave me të cilët Partia Demokratike do të konkurrojë në zgjedhjet e 25 qershorit, është parë si një surprizë. Për ata që mbetën jashtë saj, por dhe emrat e rinj të përfshirë në të.
Ndryshe nga Partia Socialiste, demokratët, gjithmonë janë mësuar t’i druhen dasisë a thua prej saj nuk mund të vinë veçse konflikte dhe dhunë. Krejt gjuha e demokratëve, është e mbruajtur me këtë frikë thelbësore dhe çdo gjë e saj vihet në kërkim të një mirazhi: t’u jepet fund ndarjeve, konflikteve dhe mospajtimeve. Duket se gjithmonë kanë pranuar t’i thonë vetes; duhet të eleminojmë atë që na ndan, duhet të krijojmë një taban të përbashkët me njëri-tjetrin, një unitet babelian të mendimit, të vendosur prej kohësh?
Pasi, me të drejtë, ndarja prej kohësh ngjall frikë dhe jo vetëm ngaqë mund të prishë paqen familjare, por edhe se mund të mbysë frymën shoqërore nëse del nga kontrolli; nëse nuk e shtrëngojmë në një kuadër normash e rregullash të përbashkëta. Dhe fryma e përngjitjes, njësimi me tjetrin, është për të mbajtur të pacenuar pushtetin e njëshit. Por nga sot, gjërat, duken se janë shfaqur ndryshe. Me sa duket, të gjithë jemi viktima të veseve tona.
Mjaftoi vetëm mbrëmjen e djeshme, në një ndërhyrje të drejtpërdrejt në emisionin “Opinion” në TV Klan, deputeti i PD-së dhe ish-ministri Arben Imami tha se kryetari Lulzim Basha nuk e ka diskutuar me kryesinë e partisë listën e kandidatëve për deputet në zgjedhjet e 25 qershorit. Sipas tij, kjo ishte një shkelje e rëndë, por me pasoja serioze në garën e fundqershorit. Ai tha se kjo listë rrezikon seriozisht humbjen e zgjedhjeve me një rezultat të thellë.
Siç edhe u pa, ‘holandezi fluturues’, fluturoi nga dritarja figura me një jetë të gjatë politike në parti e që në të kaluarën kanë mbuluar funksione të rëndësishme partiake dhe zyrtare. Po ashtu, jashtë, mbetën edhe emra të rëndësishëm të cilët janë shfaqur kritik me mënyrën se si kryetari Basha ka drejtuar partinë këto katër vite, si dhe nuk ishin pajtuar me zgjedhjen e tij për të mos marrë pjesë në garën elektorale, kur nisi protestën për të kërkuar një qeveri teknike apo dhe këmbënguljen deri në momentet e fundit për të refuzuar propozimet e komunitetit ndërkombëtar.
Në këtë rast, sigurisht, Lulzim Bashës që të shmangë konfliktin do t’i duhej me patjetër të eliminojë dasinë. Por pa konflikt nuk lindin as qytete dhe as qytetari, madje as zhvillim. Sipas mitologjisë, qyteti është pjellë e vëllavrasjes. Është Kaini ai që ndërton polis-in e parë sipas gjenezës. Pikërisht pasi vrau Remin, Romuli vendosi të themelojë Urbs-in që do të ishte djepi i kodifikimit të së drejtës. Jo pa qëllim, qytetërimi Perëndimor, strehoi në gjirin e vet dy nga mitet më të vjetra të njerëzimit. Inteligjenca e Europës ka konsistuar gjithmonë tek paradigma: ndaj dhe përçaj.
Pasi partia, nëse nuk do bëhej kjo zgjedhje e vështirë, do mbetej po ajo; me një grup parlamentar atavik dhe krejtësisht jo funksional, me pjesën më të madhe të figurave politike të stërkonsumuara dhe që shkaktojnë irritim te qytetarët, shkurt një strukturë e atrofizuar që ilustron në mënyrë perfekte modelin që do të rrëzojë Basha. Sado e dhimbshme dhe dramatike të jetë “vëllavrasja” në fund të fundit, është zhvilluese. Është pikërisht ashtu siç edhe vetë kryetari Basha e tha pak minuta më pas nga bërja publike e ekipit të tij në zgjedhjet elektorale të 25 qershorit: një proces shumë i vështirë dhe jo pa dhimbje.
Lista, e cila përmban shumë emra të rinj, duket se shënon një përpjekje të kryetarit Basha për t’i vënë vulën e tij Partisë Demokratike. Megjithatë, lëvizja e tij, përmban jo pak rrisqe. Gjithçka duket se do të varet nga rezultati që PD do të marrë në zgjedhjet e 25 qershorit, edhe pse në korrik Lulzim Basha do të duhet të futet edhe në garen për kryetarin e Partisë.
