Policia e Elbasanit arrestoi një 30- vjeçar, i cili pas një debati familjar me vjehrrin e tij, i vuri flakën banesës së këtij të fundit.
Ngjarja ka ndodhur katër ditë më parë, por vetëm në fundjavë u zbulua se kishte qenë lindja e djalit të tij shkaku që u bë sherr me vjehrrin. Burime të Policisë bënë të ditur se 30- vjeçari Ç. Kasa, nga fshati Reçan, shumë afër Elbasanit, dogji shtëpinë e prindërve të bashkëshortes së tij në mënyrë të qëllimtë, pas një debati që kishte nisur menjëherë pas lindjes së djalit të 30-vjeçarit.
DEBATI
Sipas të dhënave nga grupi i hetimit që është marrë me ngjarjen, 30-vjeçari ishte i martuar dhe kishte një vajzë rreth 4 vjeçe dhe djalin e sapolindur. Vëllai i tij, për arsye natyrale, nuk shtohej dot me fëmijë dhe për këtë arsye Kasa i kishte premtuar se do t’ia jepte atij fëmijën e dytë që do të lindte.
Dhe kështu u bë. Fëmija e dytë lindi djalë dhe që në maternitet, 30- vjeçari ia dhuroi vëllait të tij, duke hequr dorë nga atësia. Por, pa kaluar 40 ditë nga lindja e djalit, duket se nisën pakënaqësitë nga familja e prindërve të nuses së tij. Burime nga fshati bëjnë të ditur se Kasa ka shkuar në banesën e vjehrrit të tij për të pirë një kafe, por ky i fundit e ka pritur keq dhurimin e nipit të tij, aq më tepër pa iu marrë miratimi.
“Mos ia jepje djalin vëllait, por bëje një fëmijë të tretë, pasi djali ishte trashëgimtari i shtëpisë tënde”. Ky ka qenë filli i bisedës, i cili më pas ka përfunduar me debat nga ana ana e 30-vjeçarit, i cili ka këmbëngulur në të tijën, se nuk ishte pishman për veprimin që kishte kryer.
“Bëj fëmijë tjetër, nuk kam bërë mëkat që mbusha shtëpinë e vëllait tim”, i është drejtuar dhëndri. Por debati me fjalë është acaruar, pasi vjehrri e ka akuzuar atë se kishte vendosur kundër vullnetit të së bijës. E gjithë këmbëngulja e 63-vjeçarit M.S. për fëmijën ishte edhe për faktin se ai nuk kishte pasur djalë vetë dhe lindja e një nipi kishte qenë një gëzim i madh për të dhe të shoqen. Ai është befasuar kur ka mësuar se nipi i sapolindur do të rritej me prindër të tjerë dhe jo nga e bija dhe dhëndri i tij.
DJEGIA E BANESES
Pas debatesh, 30-vjeçari ka marrë në oborrin e shtëpisë një bidon me benzinë dhe i ka vënë flakën shtëpisë së vjehrrit, duke i thënë se ai nuk ka të drejtë të ndërhyjë në familjen e tij. I moshuari bashkë me gruan e tij kanë dalë menjëherë jashtë dhe fatmirësisht kanë shpëtuar nga flakët, ndërsa banesa e tyre është djegur. Banorët e fshatit kanë parë zjarrin dhe kanë lajmëruar menjëherë Policinë. Kjo e fundit bashkë me zjarrfikëset mbërritën në vend, por dëmet në banesë kanë qenë të konsiderueshme. Ndërkaq, pas marrjes në pyetje të palëve, blutë arrestuan të riun për shkatërrim prone dhe dhunë në familje.
Nga Specialistët e Hetimit të Krimit në Komisariatin e Policisë Elbasan, u arrestua në flagrancë shtetasi Ç. Kasa, 30 vjeç, banues në fshatin Reçan, Elbasan, pasi në fshatin Reçan, në konflikt e sipër për motive të dobëta me vjehrrin, shtetasin M.S., 63 vjeç, i ka vënë zjarrin banesës së vjehrrit. Si pasojë e flakëve është djegur plotësisht banesa e shtetasit M.S. Nga zjarri nuk ka asnjë person të lënduar.
Materialet i kaluan Prokurorisë pranë Gjykatës së Shkallës Parë Elbasan, për veprat penale, ‘Shkatërrimi i pronës me zjarr’ dhe ‘Dhuna në familje’, të parashikuar nga nenet 151/ 2, 130/a të Kodit Penal”, bëri të ditur Policia e Elbasanit. / Panorama.al
