E trishtë është historia e Hamit Arif Myrtjes nga Shkodra, i cili bashkë më familjen e tij, për shkak të vështirësive ekonomike, tentoi të arratisej nga Shqipëria nëpërmjet liqenit të Shkodrës, gjatë regjimit komunist.
Duke qenë se roja i ndërmarrjes së peshkimit ku ai punonte nuk pranoi ta linte të iknin, Myrtja e qëlloi me dru më kokë dhe roja ndërroi jetë.
Por, fatkeqësia do të ndodhte më pas. Një shtrëngatë shiu i përmbysi varkën dhe si pasojë u mbytën në liqen bashkëshortja me 3 fëmijët.
Hamit Myrtja arriti të kalojë kufirin, por autoritetet jugosllave e dorëzuan tek autoritetet shqiptare, të cilat e dënuan me varje në litar.
Historia e kësaj familjeje është publikuar nga historiani Kastriot Dervishi në rrjetet sociale.
“Tragjedia e një familjeje. Në foto është Hamit Arif Myrtja nga Shkodra (1944-1976) me bashkëshorten. Historia e familjes së tij është tejet tragjike. Punonte në ndërmarrjen e peshkimit në Shkodër. Nevoja ekonomike e bëri të kërkonte arratisjen nëpërmjet liqenit të Shkodrës. Mbrëmjen e datës 31.8.1976 vjen në ndërmarrje me gruan dhe tre fëmijët e tij. Iu lut rojes së ndërmarrjes ta linte të ikte se do kalonte kufirin. Kundërshtitë e rojes bënë që të përleshen dhe ta godasë me dru në kokë. Roja humb jetën. U nis ora 24.00, por për fatin e tij të keq filloi një shi e shtrëngatë dhe varka përmbyset. Gruaja dhe tre fëmijët e vegjël vdesin, ndërsa Hamiti del matanë. Nuk mjaftoi kjo por më 7.10.1976 autoritetet jugosllave e dorëzuan. U akuzua në bazë të neneve 64, 73/1 dhe 76 të Kodit Penal. E dënuan me vdekje, varje në litar dhe konfiskim të pasurisë. U var më 26.12.1976. Tejet i stresuar kërkoi ta vrisnin ballë për ballë”-shkruan Dervishi.
