Prishja e disa ndërtime në zonën e Himarës ku do ndërtohet shëtitorja ka futur në konfikt politikën greke. Ndryshe nga ministri i Jashtëm Kotzias që dha se minoritarët do dëmshpërblehen, Kryetari i Demokracisë së re, Kyriakos Mitsotakis, ka kërkuar që Brukseli të marrë në konsideratë zhvillimet në Himarë.
Shefi i opozitës greke i cilëson ngjarjet e të martës në Himarë si “një kulmim të përpjekjeve të autoriteteve shqiptare për të shkelur të drejtat e minoritetit etnik grek”.
Në një letër që i ka dërguar komisionerit Johanes Hahn, ai shkruan se “këto përpjekje ndihmohen edhe nga fakti që zonat minoritare përjashtojnë minoritetin etnik grek të Himarës dhe rajoneve të tjera, pavarësisht se ata përbëjnë një përqindje të konsiderueshme të popullsisë në këto zona”.
Mitsotakis vë në dukje se qëndrimi sipas tij anti produktiv, i autoriteteve shqiptare, “përbën burim shqetësimesh të tjera, pasi shpesh shoqërohet me një retorikë nacionaliste nga ana e qeverisë shqiptare, gjë që influencon në marrëdhëniet dypalëshe midis Greqisë dhe Shqipërisë”.
Shefi i opozitës greke e mbyll letrën e tij me shpresën se “këto shqetësime serioze do të merren parasysh në mënyrën e duhur, gjatë vlerësimit të ecurisë së Shqipërisë në procesin e anëtarësimit në Bashkimin Europian”.
Kujtojmë se një ditë më parë, ministri i jashtëm grek, Nikos Kotzias tha se Athina greke nuk është kundër projektit zhvillimor në Himarë. Ai tha se është rënë dakord me Shqipërinë që të dëmshpërblehen ata banorë që kanë certifikatë pronësie.
“Përsa i përket pronave,ato që u prishën sot,pronarët e tyre s’munden të sigurojnë tituj pronësie,ndaj dhe s’munden të kërkojnë dëmshpërblime siç bëhet kudo tjetër. Përjashtim bënte vetëm karburanti,për të cilin dje natën vonë kishte konsultime, dhe një premtim nga ministri i Energjetikës,nga zëvendësi i tij,i cili premtoi se do i jepet leje të ndërtojë karburant diku tjetër. Presim ta mbajnë këtë premtim”, u shpreh Kotzias.
