TIRANE- Qeveria shqiptare ka dhënë me një të rënë të lapsit plot 2 milionë euro një studioje ligjore britanike për të mbrojtur Shqipërinë në procesin gjyqësor me Francesco Becchettin.
Sipërmarrësi italian që ngriti edhe një TV në Shqipëri u akuzua nga prokuroria shqiptare për pastrim parash dhe evazion fiskal. Becchetti e çoi çështjen në arbirazh ndërkombëtar dhe qeveria mori masa për tu mbrojtur në këtë gjyq.
Pyetjet që shtrohen janë të shumta. E para: Si u përzgjodh studioja ligjore ‘Wragge Lawrence Graham & Co LLP’ që do të bëjë avokaten e Shqipërisë në këtë gjyq? Cila është procedura e seleksionimit të studiove ligjore? Avokatura e Shtetit e ka bërë përzgjedhjen në fshehtësi të plotë.
E dyta: Shuma prej 2 milionë eurosh, relativisht e lartë, lë sërish hije dyshimi?
E treta: Kush fshihet pas kësaj studioje, kush negocioi me Qeveria shqiptare, a fshihen sërish Blerët? A ka avokatë shqiptarë të përfshirë në këtë çështje? Këtyre pyetjeve duhet tu japër përgjigje Qeveria shqiptare, për të bërë transparencë për mënyërn se si shpenzohen lekët e buxhetit të shtetit.
Vendimi
Sipas një vendimi të datës 9 dhjetor 2015 që u zbulua nga mediat, studios avokatore që do të përfaqësojë Shqipërinë në arbitrazh do t’i paguhen 1.95 milionë euro, një prej shifrave më të larta të paguara deri më sot nga shteti shqiptar. Megjithëse është marrë para më shumë se një muaji, vendimi është publikuar vetëm dje në Fletoren Zyrtare.
“Këshilli i Ministrave vendosi Autorizimin e Ministrisë së Energjisë dhe Industrisë që, nëpërmjet Avokaturës së Shtetit, të lidhë shtesë kontrate, me firmën avokatore ‘wragge Lawrence Graham & Co LLP’, thuhet në vendim.
Gjyqi
Biznesmeni italian Francesco Becchetti, ndaj të cilit Prokuroria ka kërkuar arrest dhe sekuestër të aseteve, pas dyshimeve për pastrime parash dhe evazion fiskal, po kërkon të fitojë “në tavolinë” 160 milionë euro nga shteti shqiptar, nëpërmjet kompanive të krijuara prej tij dhe të drejtuara nga familjarë e bashkëpunëtorë, ndërkohë që nuk ka realizuar as projektin energjetik, për të cilin erdhi në Shqipëri 18 vjet më parë.
Shteti shqiptar ndodhet në gjyq arbitrazhi ndërkombëtar me disa nga këto kompani, në dy procese të ndryshme. Fjala është për problem që lidhen me mosrealizimin e dy koncesioneve të dhëna disa vite më parë.
Kompanitë e Albaniabeg ambient sh.p.k., Angelo Novelli and Costruzioni S.R.L. kanë hedhur në gjyq Qeverinë shqiptare, duke i kërkuar 150 milionë euro dëmshpërblim për mosrespektim të kontratës për djegien e plehrave të sjella edhe nga Italia.
Ndërsa gjyqi tjetër ka të bëjë me mosndërtimin e hidrocentralit të Kalivaçit mbi Vjosë nga kompania Hydro Srl. Shtetit shqiptar i kërkohet të paguajë një shumë prej 10 milionë eurosh për TVSHnë lidhur me këtë projekt.
