Apeli i GJKKO-së rikthen në qeli Pëllumb Abeshin, njërin prej të akuzuarve lidhur me hetimet për dosjen e inceneratorit të Tiranës. Më herët ai ishte me masë sigurie “arrest ne shtëpi”, por gjykata i ndryshon atë në “arrest në burg”.
Vendimi u dha sot nga gjyqtari i Apelit të GJKKO-së, Dhimitër Lara i cili pranoi kështu ankimimin e SPAK vetëm për 1 nga 8 personat në hetim.
Abeshi gjithashtu rezulton i dënuar edhe për inceneratori e Fierit, dënim të cilin e vuante në “arrest shtëpie”. Abeshi u lirua në 10 janar, para 17 ditësh për shkak të përfundimit të afateve të paraburgimit.
Kujtojmë se lidhur me inceneratorin e Tiranës tetë janë shkeljet që SPAK thotë se ka gjetur nga hetimet. Mes tyre është dhe fakti që anëtarët e Komisionit të Vlerësimit të Ofertave nuk kanë hartuar dokumentacionin për zhvillimin e kësaj procedure, por i gjithë procesi është kryer nga punonjës të biznesmenit Klodian Zoto.
Një tjetër shkelje e evidentuar nga prokuroria gjatë këtij hetimi është studimi i fizibilitetit, që është kryer në mënyrë fiktive. Kjo, pasi SPAK ka zbuluar se ajo është realizuar përmes të dhënave të marra nga kompania “Integrated Energy BV”, e cila ka rritur kostot.
Prokuroria e Posaçme gjithashtu thotë se për të funksionuar kjo skemë është dashur kontributi i Vladimir Bezhanit, i cili sipas SPAK ka qenë ura lidhëse mes Ministrisë së Mjedisit dhe kompanisë koncesionare. Me rolin e këshilltarit të jashtëm të ministrit të Mjedisit, Bezhani ka përfituar si rryshfet një shumë prej 75 milionë Lekë.
Ndërsa Alqi Bllako ka përfituar nga Klodian Zoto dhe Mirel Mërtiri 119 mijë Euro me qëllim favorizimin “Integrated Energy BV”.
Sakaq, dy pronarët e kompanisë Zoto e Mërtiri kanë paraqitur fatura fiktive për punime të pa kryera duke përfituar rreth 400 milionë Lekë, një pjesë e të cilave janë tërhequr cash dhe dërguar jashtë Shqipërisë.
