Kryeprokurori i Përgjithshëm, Adriatik Llalla ka firmosur ndryshimin e disa drejtuesve në disa prokurori, fillimisht në Kukës dhe Tropojë.
Burimet nga Prokuroria e Përgjithshme thanë se këto ndryshime kanë ardhur për shkak të rritjes së performancës së hetimeve në disa prokurori të vendit.
Me shumë gjasa, kryeprokurori Llalla, po përdor mënyrat e vetme të kontrollit të institucionit, deri në krijmin e institucionit të inspektimit.
Mësohet se Artur Ismailkukaj nga Tropoja kalon drejtues në Kukës dhe në vend të tij shkon Artan Shtrungza. Ndërsa, drejtuesja e prokurorisë së Kukësit deri më tani, Rita Gjati nga kryeprokurore e Kukësit kalon prokurore e thjeshtë në Tropojë.
Ndërkohë këto lëvizje pritet të pasohen nga të tjera javën e ardhshme ku në sitë po kalon performanca e akuzës për gjashtë mujorin e 2017-ës.
Me sa duket, këto levizje janë burim edhe i hetimeve të vazhdueshme të kryeprokurorit Llalla, kryesisht pas denoncimeve të shumta të qytetarëve.
Një rast i tillë, mund të konsiderohet edhe për ish-prokuroren e Kukësit, që është lëvizur ditën e sotme, si prokurore e thjeshtë në Tropojë.
Pak ditë më parë, Opinion.al ka marrë një denoncim nga shtetasi Ledian Halilaj, i cili, bënte me dije se ka marrë disa mesazhe kërcënuese nga prokurorja e deri djeshme e Kukësit, Rita Gjati.
Sipas Halilajt, kërcënimi i ish-prokurores Gjati, ka ardhur pas një postimi në rrjetin e tij social, Ledjani lajmëronte pafajësinë e babait të tij, i akuzuar për një rast kontrabande.
Ai tregon se është kërcënuar në telefon nga prokurorja e Kukësit, Rita Gjati.
“Do të të shkatërroj përfundimisht. Mbaje mend çkam me të bo”, janë disa nga frazat e kërcënimit që qytetari pretendon se ka marrë në telefon nga prokurorja.
Halilaj, deklaron se i është drejtuar autoriteteve më të larta të vendit, duke denoncuar kërcënimin.
