Komisioni i Ligjeve ka në rend të ditës sot ndryshimin e rregullores përsa i përket ligjvënësve për të cilat Prokuroria kërkon hetim.
Sipas rregullores së re, nëse Prokuoria do të kërkojë hetim për heqjen e imunitetit të një deputeti, provat që ka organi i akuzës duhet tua paraqese edhe anëtarëve të Këshillit të Mandateve.
Sipas draftit të zbardhur nga gazeta “Panorama”, bëhet fjalë për ndryshimin e mënyrës se si deir tani Prokuroria ka kërkuar heqjen e imunitetit të deputetëve.
“Sipas ndryshimit, kërkesa për të autorizuar caktimin e masës së sigurimit të arrestit në burg ose në shtëpi, heqjes së lirisë në çfarëdolloj forme, kontrollit personal ose të banesës, i paraqitet kryetarit të Kuvendit nga prokurori dhe kërkesa duhet të përmbajë një relacion të arsyetuar dhe të shoqëruar me provat që mbështesin kërkesën.”
Një tjetër ndryshim që do të shqyrtohet nga Komisioni i Ligjeve është edhe zhvillimi i seancës.
Deri më tani, Prokuroria ka kërkuar arrestimin e deputetëve bazuar në indicie dhe dyshime të arsyeshme. Një tjetër ndryshim ka të bëjë me zhvillimin e seancës. Në nismën e depozituar në Kuvend, nenit 118, i është shtuar një pikë, e cila parashikon që Kuvendi, në seance plenare, për arsye të mbrojtjes së të dhënave, mund të zhvillojë diskutimin me dyer të mbyllura.
Në rregulloren në fuqi të Kuvendit nuk parashikohet mundësia që seanca të zhvillohet më dyer të mbyllura. Krahas kësaj, parashikohet gjithashtu edhe një ndryshim tjetër, i cili vështirëson punën e organit të akuzës në rastet kur kërkon ndjekjen penale të ligjvënësve.
Në rregulloren e re të Kuvendit përcaktohet se: “Shqyrtimi i çështjes në Këshillin e Rregullores, Mandatet dhe Imunitetit, kryhet nëpërmjet një procedure që i garanton deputetit, ndaj të cilit kërkohet autorizimi për procedim, të drejtën për t’u informuar në kohë, për t’u pyetur, për t’u dëgjuar dhe për të bërë pyetje ndaj kërkuesve të autorizimit si dhe për të paraqitur shpjegimet e tij.”
Në përfundim të diskutimit, Këshilli i Rregullores, brenda një jave, harton raportin për në seancë plenare. Raporti rekomandon miratimin ose rrëzimin e kërkesës për dhënie autorizimi për procedim”. Kësisoj, Kuvendi në vetvete merr atributet e një Gjykate, ku vendimin për dhënien e autorizimit për arrestimin apo heqjen e lirisë të një deputeti duhet ta vendosë organi ligjvënës dhe jo Gjyqësori. / Panorama
