Avokati Maksim Haxhia dhe njëkohësisht kreu i Dhomës së Avokatisë ka propozuar që harta e re gjyqësore të pezullohet deri në hartimin e hartës së re territorial.
Ky ka qenë një nga propozimet e Haxhiajt në Komisionin e Ligjeve, me qëllim gjetjen e zgjidhjes për t’i dhënë fund edhe bojkotit të avokatëve.
“Harta gjyqësore nuk është reformë në drejtësi, është krijimi i një infrastrukture mbi studime për t’i ardhur në ndihmë eficensës së drejtësisë, që të kemi një drejtësi kualitative. E kemi bërë të qartë se përfaqësojmë publikun, janë nga ato raste kur interesat e dhomës përputhen me interesat e qytetarëve. Kemi hallin që drejtësia të jetë eficente me këtë hartë nuk është. Nuk e kemi hallin si do paguhemi.
Ne pretendojmë që shërbimi të shkojë te qytetari, po kjo hartë e largon qytetarin nga shërbimi, pa I hyrë problemeve sociale, vetëgjyqësia, hakmarrja, dhuna në familje etj. Të gjitha këto I argumentuam dhe dhamë edhe zgjidhjet tona. Ne jemi për të zgjidhur probleme. Kjo hartë ishte për shkak se mungonin gjyqtarët, megjithatë i afruam KLGJ edhe zgjidhje. Nëse nuk doni t’i bëni avokatët me status të përkohshëm gjyqtarë, bëjini këshilltar.
Ne kërkuam, në radhë të parë për eficensën në drejtësi dhe bëmë propozimet tona, mos kalojmë nga 6 në 1 Apel. Shteti s’ka godina.
Thamë edhe Apeli i Tiranës të ndahet në civil e penal dhe një prej tyre le të shkojë në Durrës. Propozuam që gjykatat e shkallës së parë të kthehen në seksione administrative, kërkuam që Saranda, e pranuam dhe ishte zgjidhje politike jo teknike, të ketë gjykatë të shkallës së parë. Po ashtu kërkuam edhe për Lushnjen, s’ka asnjë lidhje gjykatë administrative në Lushnje, nuk u mor asnjë, edhe pse dhamë kontributin tonë, me përgjegjësi bëmë kundërshtimet tona. Propozuam të bëhen me faza, jo menjëherë.
Ne nuk besojmë se e keni seriozisht, edhe këtë dëgjese. Ju po bëni hartën territoriale dhe nuk e keni seriozisht se po ta keni seriozisht do e pezullonit hartën gjyqësore, kërkesa jonë është pezulloni hartën gjyqësore deri sa të bëni hartën territoriale, mos fillojmë prapë themelet. Kjo është kërkesa jonë”,-tha avokat Haxhia.
