Pas deklaratës nga ana e ministreve Shahini dhe Manastirliu lidhur me vendimin për hapjen e shkollave, ka reaguar Partia Demokratike.
Përmes një publikimi në rrjetin social Facebook, ish-deputetja Albana Vokshi tha se qeveria nuk ka asnjë plan dhe dalja e dy ministreve u bë nën presionin e PD.
“Deklarata e qeverisë për rihapjen e shkollave në shtator u bë në nxitim e sipër, nën presionin e vazhdueshëm të PD. Dalja e dy ministreve krijoi më shumë paqartësi sesa dha sqarime, sepse qeveria nuk ka asnjë plan. Një qeveri me plan, e cila nuk vepron në panik dhe nuk improvizon, do të kishte publikuar sot udhëzuesin e detajuar për rihapjen e shkollave në kushtet e pandemisë”, shkruan Vokshi e cila ngre më poshtë disa pyetje, ndërsa thotë se strategjia pë rihapjen e shkollave duhet të bëhet publike.
“ Sa të gjata do të jenë orët e mësimit? Me sa turne do të jetë mësimi në Tiranë, ku shumica e shkollave janë me dy turne? Me sa nxënës do të jetë një klasë? Ku do të mësojnë nxënësit e shkollave të shkatërruara pas tërmetit? Me rritjen e numrit të klasave me turne, sa është numri i mësuesve dhe ndihmës mësuesve që do të punësohen? Cili është protokolli i sigurisë që do ndiqet në cdo shkollë dhe masat mbrojtëse që do sigurohen nga qeveria? Mbi të gjitha, sa është buxheti shtesë për të përballuar pandeminë në shkolla? Nxënësit, studentët dhe prindërit e tyre nuk kanë nevojë për daljet me skype e deklaratat boshe, që nuk sqarojnë asgjë. Strategjia për rihapjen e shkollave duhet të jetë publike”, shkruan Vokshi./Opinion.al
