UEFA ka vendosur të bëjë publik vendimin e argumentuar të Komisionit të Apelit mbi dënimin e Skënderbeut, i cili prej kohësh i është dorëzuar edhe Federatës Shqiptare të Futbollit. Ndërkohë që kjo e fundit refuzoi ta bëjë publik, pavarësisht kërkesave të shumta nga media, më në fund janë zbuluar edhe argumentet dhe ndeshjet e përfshira në listën e atyre të trukuara dhe maksimalisht të dyshuara.
Janë dhjetë takimet që janë cilësuar si të provuara për manipulim, duke iu referuar fakteve dhe provave që kanë mbledhur inspektorët e UEFAs dhe Sistemi i Zbulimit të Mashtrimit me Bastet (BFDS). Ndërkohë janë 43 takime të tjera, për të cilat ka fakte dhe anomali bastesh që gjithashtu janë cilësuar si rezultate të paracaktuara. Në të gjitha, përfshihen plot 41 takime të kampionatit vendës, çka zbulon hapur mashtrimin e FSHFsë se në dënimin e Skënderbeut nuk kishte asnjë ndeshje të dyshuar nga Kategoria Superiore. Madje, bie në sy që ka edhe prej atyre të edicionit të kaluar, ku korçarët u shpallën kampionë, duke kompromentuar kështu në mënyrë të hapur garën.
Një tjetër provë e marrë parasysh, përveç lidhjeve të presidencës së Skënderbeut me kompanitë e basteve, apo anomalive të tyre, janë edhe dëshmitë e dy individëve. Ajo e portierit të Krusadersit dhe ajo e Luis Manuel Blankos për ndeshjen kundër Dinamos, disa vite më parë. Prova dhe argumente për manipulime ndër vite të klubit korçar. Më poshtë do të paraqiten edhe konkluzionet e Komisionit të Apelit, në marrjen e vendimit për ta dënuar me përjashtimin 1 vit nga kompeticionet ndërkombëtare. Mes emrave të përmendur si personat të implikuar dhe që kanë mbështetur klubin në trukime, bie në sy ai i ishministrit të Financave, Ridvan Bode. Neni 4.02, që i referohen mbi dënimin, parashikon qartë që lidhet me “manipulimin dhe trukimin e rezultatit të ndeshjeve”, duke rrëzuar poshtë edhe pretendimin se Skënderbeu nuk ishte dënuar për një akuzë të tillë./ Panorama.al
