Rudina Hajdari ka replikuar me kryeministrin Rama, duke e akuzuar se relativizon problemet me humor. Ajo ka sulmuar edhe marrëveshjen e vitit 2008 mes PD dhe PS, duke thënë se Parlamenti ka një cilësi më të ulët se më parë.
Por Rama i është kundërpërgjigjur, duke i thënë se pikërisht prej asaj marrëveshje Rudina Hajdari është në sallën e Parlamentit.
“Po të mos ishte marrëveshja e vitit 2008, ju nuk do të ishit në këtë Parlament. Ja një e mirë që solli marrëveshja. Sot ka më shumë gra se burra në Parlament, edhe në qeveri. Unë nuk bëj gjyqin e dinjitetit, e neveris. Nuk mendoj se cilido prej nesh është në lartësinë të japë kategorizimi njerëzit dinjitozë dhe jodinjitozë. Di të them që kemi pasur zgjedhje më të mira se më parë, kemi pasur më pak konflikte se më parë. Në këndvështrimin tim, kemi parlament më cilësor se më parë”, tha Rama.
Lidhur me humorin, Rama e këshilloi të lexonte Mark Tuenin, duke thënë se humori është mënyrë për të trajtuar problemet therësë.
“Dua t’ju sugjeroj të lexoni Mark Tuenin, që thotë gjëra shumë interesante për ju lidhur me këtë, e thotë se humori është e vetmja armë për t’iu kthyer brutalitetit pa rënë në brutalitet. Nga ana tjetër, nuk mendoj se njerëzimit i ka ardhur ndonjëherë ndonjë e keqe nga e qeshura. Besoj se momentet më të bukura të Parlamenteve shumë më të lartë se i yni, janë momentet kur bëhet humor. Por mes tij, thuhen të vërteta therëse”, u shpreh Rama./Opinion.al
