Ekonomia shqiptare vijon të jetë nën efektin e pandemisë ndërsa 17 mijë persona kanë humbur punën gjatë kësaj periudhe njoftoi guverantori i Bankës së Shqipërisë, Gent Sejko.
Ai tha se ekonomia është tkurrur me 2.52% dhe rënia pritet të vijojë përgjatë 2020 ndërsa përmirësimi parashikohet vetëm në tremujorin e dytë të vitit të ardhshëm.
“Ekonomia ka qenë nën efektin e fortë të pandemisë në tremujorin e dytë. Reduktimi i kërkesës kanë sjellë rënie të prodhimit dhe rritje të papunësisë. Sektori banker mbetet i shëndetshëm. Hapja e ekonomisë dhe ambienti i qëndrueshëm krijojnë premise për të pasur rritje në vijim. Miksi aktual i politikave fiskale dhe monetare është i duhur. Sipas të dhënave ekonomia u tkurr me 2.52%. Ekonomia humbi 17 mijë vende pune gjatë pandemisë. Goditja e pandemisë është forcuar edhe më tej dhe tregtia apo eksporti u tkurr me 33%. Të ardhurat buxhetore u tkurrën me 30% në tremujor duke reflektuar rënie të konsumit. Ekonomia pritet të shënoi një rënie të madhe në vitin 2020. Aktiviteti ekonomik pritet të shënojë pikun negative në tremujorin e dytë. Në gjysmën e dytë të vitit 2021 do të ketë një stabilizim të ekonomisë. Inflacioni pritet të qëndroj pranë niveleve aktuale. Bankat kanë rritur kreditimin për bizneset duke i mbështetur me likuiditet për përballimin e krizës. Madje bankat kanë marrë përsipër edhe goditjet mbi supe duke dhënë kredi”, tha Sejko.
Teksa riktheu vëmendjen tek eurobondi 650 mln euro që Shqipëria ka marrë, guverantori theksoi se marrja e tij i siguron qeverisë fondet e nevojshme për përballimin e pandemisë dhe i lehtëson punën e bankave të nivelit të dytë.
“Marrja e eurobondit i siguron qeverisë fondet e nevojshme për përballimin e pandemisë dhe i lehtëson punën e bankave të nivelit të dytë.
Eurobondi ishte një mjet i domosdoshëm dhe një element pozitiv për ekonominë në këtë situatë ku ndodhemi. Norma e interesit është në një nivel mjaft të mirë. Momenti i daljes së eurobondit ishte një moment pozitiv”, u shpreh guverantori.
I pyetur se sa kanë përfituar nga garancia e dytë sovrane, guvernatori tha se
“Garancia e dytë ka një nivel më të ulët edhe sepse kriteret e rrezikut kanë qenë më të larta. Janë disbursuar 9 mln euro. Situata është duke u menaxhuar dhe aktorët duhet të koordinojnë më mirë përpjekjet. Duhet pasur parasysh që kostoja e krizës duhet shpërndarë në mënyrë proporcionale.
Të shpresojmë që do kemi një rritje ekonomike sipas parashikimit, Ky do jetë i vështirë dhe shpresojmë të mos kemi falimente. 2021 do të jetë viti i rritjes ekonomike”, përfundoi Sejko. /Opinion.al
