Javën e kaluar, qeveria e Greqisë ka miratuar një dekret për ndërtimin e krematoriumit të parë në vend. Ky është një vendim që pritej prej kohësh, diktuar edhe nga rregullat europiane për administrimin e kufomave, por edhe për shkak të një problemi të madh që po përjeton shteti helen me varrezat.
Ndërtimi i krematoriumit të parë në Athinë, është quajtur “hap historik” nga kryebashkiaku Giorgos Kaminis, ndërsa kryeministri Alexis Tsipras ka folur për një “reformë shumë të rëndësishme dhe urgjente”. Gjithashtu duhet të ndërtohen edhe dy krematoriume në Selanik dhe Patra, projektet e të cilave janë miratuar me kohë, por që kanë hasur kundërshtimin e Kishës Ortodokse.
Për shkak të kundërshtimit të Kishës, në Greqi ka qenë i ndaluar ndërtimi i krematoriumeve deri në vitin 2006, por gjithsesi, edhe pas këtij viti asnjë i tillë nuk u ndërtua. Rritja e madhe e popullsisë në gjysmën e dytë të shekullit XX, krijoi një problem kronik me hapësirën e varrezave, ku në shumë qytete ishte normale që pas tre vitesh, eshtrat e të vdekurve të zhvarroseshin dhe të dërgoheshin në një vend të përbashkët, për të liruar vendin për të tjerët.
Edhe sot e kësaj dite, kush dëshiron të djegë trupin e të afërmve të ndarë nga jeta, duhet ta bëjë atë jashtë vendit, kryesisht në Bullgari. Pa llogaritur kostot e tjera të funeralit, vetëm çmimi i djegies së trupit në Bullgari i kalon 1500 eurot. Vlerësohet se çdo vit, janë 3000 deri në 4000 grekë që dërgojnë trupat e të afërmve për t’i djegur jashtë vendit, për shkak se nuk mund ta bëjnë në Greqi./Opinion.al
