Vizita e presidentit të SHBA-së, Barack Obama në Greqi është shoqëruar përgjatë ditës me protesta në Athinë. Rreth 3 mijë anarkistë, shumica studentë marshuan nëpër qendrën e qytetit, në një demonstratë të planifikuar fillimisht para Ambasadës Amerikane në Athinë.
Protestuesit janë përleshur me policinë, pasi kanë tentuar të thyejnë kordonin e vendosur nga ata. Mediat greke kanë bërë me dije se nuk ka të lënduar dhe as persona të arrestuar.
Mësohet se rreth 5 mijë policë janë angazhuar për të qetësuar situatën, ndërsa nga ana tjetër, anarkistët kanë bërë thirrje për dhunë dhe sulme që të bëjnë të mundur mosrealizimin e vizitës së Presidentit Amerikan në Athinë, në fund të mandatit të tij.
Vizita e fundit në Greqi, e një presidenti amerikan, ishte ajo e Bill Clinton në vitin 1999. Por kjo vizitë ishte penguar nga demonstruesit që ishin mbledhur nëpër rrugë e që nisën të sulmojnë gjithçka, përfshirë edhe policinë, duke pamundësuar kështu vizitën e Clinton në Greqi.
17 vite më pas, anarkistët grek tentuan të bëjnë të njëjtën gjë, për të penguar vizitën e presidentit amerikan, Barack Obama në Athinë.
Vizita e Obamës vjen dy ditë para demonstratave kryesore anti-amerikane që përkujtojnë shtypjen e përgjakshme ushtarake të vitit 1973, që ishte një kryengritje pro demokracisë./Opinion.al/
