ATHINË– Aleksis Cipras do të jetë sërish Kryeministër i grekëve për 4 vitet e ardshme. Ai e çoi vendin në zgjedhje të parakohshme pasi humbi shumicën parlamentare. Partia e tij, Syriza ka marrë në zgjedhjet e së dielës (20 shtator) më shumë se 35% të votave duke siguruar 145 vende në Parlament, e dyta vjen Demokracia e Re me 28 % të votave. Radikalët e Agimit të Artë renditen të tretët me 7.05%, të votave, dhe PASOK me një humbje dramatike me rreth 6 perqind te votave. “Rimëkëmbja nuk do të vijë me magji, por me luftë”, tha Cipras në fjalimin e parë pas fitores. “Do të mbrojmë të dobëtit, duke rishpërndarë pasurinë e të pasurve”, tha Cipras. Sot pritet që ai të marrë mandatin nga Presidenti dhe të nisë bisedimet me kryetarët e partive të tjera për të formuar koalicionin qeverisës.
Brenda një viti grekët kanë shkuar tre herë në qendrat e votimit. Zgjedhjet e përgjithshme të fillimvitit kur Tsipras erdhi në pushtet, referendumi korrikut për marrëveshjen e eurozonës dhe zgjedhjet e shtatorit pasi Qeveria humbi shumicën parlamentare.
